Kufe ababili kubanjwa inkunzi esitolo
KUBULAWE amadoda amabili abesolwa ngokubamba inkunzi e-sitolo eGreenfield, eCato Manor ngoMsombuluko ebusuku.
Kulesi sigameko kulimale nelungu lomphakathi laphuthunyiswa esibhedlela.
Okhulumela amaphoyisa KwaZulu-Natal, uCaptain Nqobile Gwala, uthe ngoMsombuluko ngabo 6.30 ntambama amaphoyisa athole umbiko ngokubanjwa kwenkunzi esitolo.
Kuthe uma efika endaweni abebizwe kuyo athola umgilwa owatshele ukuthi ubenza umsebenzi wakhe wokushaya isisefo semali ngesikhathi kufika amadoda amane aphoqa bonke abantu ukuthi balale phansi.
“Abasolwa kuthiwa bavale umnyango base beqala ukufaka izimpahla ezikhwameni. Ngesikhathi amalungu omphakathi ebona ukuthi kukhona okwenzekayo aqoqane ngaphandle kwesitolo,” kuchaza uCaptain Gwala.
Uthe abasolwa baphume begijima, badubula bebhekise kumalungu omphakathi, kwadubuleka umuntu oyedwa ophuthunyiswe esibhedlela.
Ngesikhathi abasolwa bebaleka kuthiwa kudubuleke abasolwa ababili bashona.
Abanye ababili babalekile. UCaptain Gwala uthe akucaci ukuthi ubani odubule ebhekise kubasolwa.
Uveze ukuthi bobabili abasolwa bebefunelwa icala lokuzama ukubulala nokubamba inkunzi ebhizinisini.
UCaptain Gwala uthe kuvulwe icala lokubamba inkunzi ebhizinisini, ukuzama ukubulala nokubulala esiteshini samaphoyisa eCato Manor. Uthe kusaphenywa, akukaboshwa muntu.