Kuningi okwenza ingane idube ukuncela ibele
NGESONTO eledlule ibisematheni indaba yokukhuthaza ukuncelisa ibele, okuwumkhankaso owenziwa minyaka yonke ngabezempilo emhlabeni jikelele.
Yize abanye abazali bengenankinga yokuncelisa, abanye bayeka bengazimisele. Kuthiwa kuyenzeka ukuthi ingane idube ibele unina esathanda ukuyincelisa. Leli temu libizwa ngeNursing Strike yilapho ingane iduba ibele kungakafaneli iliyeke. Abazali abakhulume neSolezwe baveze ukuthi kuphulana umoya ukuyeka kwengane ibele kungakafanele, abanye abakuthatha ngokuthi kusuke kukhona inkinga kunina.
Nokho ongoti bathi lesi yisimo esijwayelekile kwezinye izingane, okunezizathu eziningi eziholela ekutheni idube ibele.
UNkk Nokuthula Makhaya onezingane ezimbili, uthe zashesha zayeka ukuncela ibele.
Uveze ukuthi indodana yakhe yokuqala esineminyaka eyisikhombisa, yayeka ibele inezinyanga ezine izelwe.
“Kwaba buhlungu kakhulu enganeni yokuqala ngoba kwenziwa nemizamo eminingi kodwa ingane yangabuyela ebeleni. Kuze kwasetshenziswa imithi yesintu ngoba ekhaya bebekholelwa ukuthi kunomoya omubi owenza ingane idube ibele,” kusho yena.
Uthe waphoqeleka ukuthi ayincelise ibhodlela yasheshe yaqala nokudla. Indodakazi yesibili esineminyaka emine, uthe yayeka inezinyanga ezintathu izelwe.
UNksz Buyi Madlala uthe ucabanga ukuthi ukuyincelisa nobisi lwebhodlela yikona okwenza ukuthi ingane yakhe iyeke ibele.
UNksz Madlala onendodakazi eneminyaka emithathu, uthe yancela izinyanga ezimbili kuphela.
“Ngamncelisa ubisi lwebhodlela enenyanga ezelwe. Ngangenzela ukumjwayeza ibhodlela ukuze angalixwayi uma sengibuyela emsebenzini. Wavele waduba ibele wagxila ebhodleleni,” kusho uNksz Madlala.
Ngokombiko oshicilelwe yiNatural Child Project, kuthiwa ziningi izizathu ezenza ingane idube ibele. Ezinye zazo kubalwa ukunceliswa ibhodlela. Kuthiwa uma ingane ikalelwa izikhathi zokuncela ibele, kuyenzeka ilidube unomphelo. Ukugula kwengane nakho kuyayenza ukuthi igcine ingasafuni unomphelo ukuncela. NgokweWorld Health Organisation kuthiwa ingane kumele incele ibele okungenani izinyanga eziyisithupha. UDkt Sbongiseni Dhlomo, onguNgqongqoshe woMnyango wezeMpilo KwaZulu-Natal, unxenxe abazali ukuthi bancelise ibele. Uyawuhlaba nomkhuba wokuthi bangavunyelwa ukuncelisa enzindaweni zomphakathi. AbeWorld Alliance for Breasfeeding Action bathi ukuncelisa ibele kuvikela izifo.