Awanqandwe amakhosi acindezela amalungelo
SISENYANGENI u-Agasti yokuqhakambisa abesifazane eNingizimu Afrika kepha zilokhu zivele njalo izenzo nezigigaba ezibacindezelayo nezibahlukumezayo.
Esinye sazo ngesodaba esibike ngalo lowesifazane waseMsinga obhekene nenhlawulo enkantolo yesizwe sabaThembu, izolo obekulindeleke ukuthi abuyele khona esigodini sakwaNgubo, eMsinga.
Icala lakhe ngelokuthi wakhumula inzilo yokushonelwa wumyeni wakhe ngesikhathi sasehlobo.
Ngokusho kwenkosi uSiphamandla Mthembu, okwenza kube yicala ukukhumula inzilo ngesikhathi sasehlobo wukuthi isizwe sabaThembu kasiyithinti inzilo ehlobo kodwa kukhunyulwa ebusika kuphela.
Amakhosi njengabaholi bomphakathi banemithetho nezindlela ababusa ngako, lokhu sikuqonda kahle.
Siyakuqonda futhi nokuthi eNingizimu Afrika izwe lonke – emakhaya nasemadolobheni – lilawulwa wuMthethosisekelo, wona ogcizelela ukuthi umuntu nomuntu unelungelo lokuzikhethela.
Kungalesi sizathu sikubona kuwukucindezela ilungelo lalo wesifazane lokuzikhethela.
Sikubona futhi kunesimo sokugxambukela ezindabeni zemindeni ngoba imindeni ihluka ngemikhuba futhi iba nezizathu ezehlukene eziyiphoqa ukuba yenze izinto ngesikhathi esithize.
Izinqumo ezinjengalezi sibona zisibuyisela emuva singabantu abamnyama, ikakhulukazi abantu besifazane.
Embikweni wethu, isazi samasiko, uSolwazi Jabulani Maphalala, sikucacise kahle ukuthi ukuzila nokukhunyulwa kwayo wudaba lomndeni kuphela okungamele kugxambukele kulo abanye abantu.
Siyethemba ukuthi uMnyango wezokuBusa ngokuBambisana neziNdaba zoMdabu KwaZuluNatal nezinye izinhlaka zobuholi bendabuko kuzongenelela kulolu daba ukuze lingacindezelwa ilungelo lalo wesifazane nomndeni wakhe lokuzikhethela futhi kungabi khona ukugxambukela okungenasidingo ezindabeni zomndeni.