Isexwayiso kothisha abakokotela iziqu
UMKHANDLU olawula othisha kuleli iSouth African Council for Educators (SACE) uthi usebenzisana noKlebe ukubamba othisha abakokotela iziqu zokufundisa.
Lo mkhandlu uxwayise labo thisha abafuna ukuthatha amashansi ngokubhalisa kuwona besebenzisa iziqu ezingombombayi ukuthi banezinhlelo zokubheka ubuqiniso bazo zonke iziqu ezilethwa kulo mkhandlu.
Okhulumela umkhandlu, uMnuz Themba Ndhlovu, uthe bayabanjwa bagwetshwe labo thisha abakokotela iziqu zokufundisa.
Uthe lo mkhakha akuwona owokuthi abantu bathathe amashansi ngoba babhekele ikusasa lezingane.
UNdhlovu uthe uthisha owabanjwa emahhovisi alo mkhandlu ngoMeyi ezobhalisa ngeziqu ezingumbombayi ugwetshiwe yinkantolo muva nje.
“NgokoKlebe lo thisha ugwetshwe yinkantolo yezimali ePitoli ngeledlule, wanikwa isigwebo sezinyanga ezingu-12, elengiselwe iminyaka emithathu.
“Unikwe umbandela wokuthi angatholakali enza icala elifanayo,” kusho uNdhlovu.
Uthe bayasamukela lesi sinqumo ngoba sizothumela umyalezo oshubile kulabo abakokotela iziqu zokufundisa. “Njengoba sisebenzisana noKlebe, kuleli sonto sizothula kulolu phiko amacala angu-18 ukuze aphenywe.
“Akhona amanye amacala asezandleni zalolu phiko.
“Mathathu eMpumalanga, lilodwa eLimpopo abe mathathu eGauteng,” kusho uNdhlovu.
Unxuse umphakathi ukuthi ubike labo abasebenza ngeziqu zomgunyathi.
UNdhlovu uthe bafuna oKlebe baphenye nomsuka walezi ziqu nalapho zigaywa khona.
“Njengoba sibabamba nje sifuna baveze lapho bezithola khona lezi ziqu ukuze sivale lesi sidleke.”
Uthe uma kukhona abakusolayo ngeziqu ezilethwa othisha bashayela izikhungo abazithola khona babheke ukuthi lowo muntu unazo ngempela iziqu azithole kuleyo nyuvesi wathi lokhu bakwenza ukuze baqede ngabakokotela lezi ziqu.