Ubulawe esememulweni
KUSOLWA izimpi zezigodi ngokubulawa kowesilisa ememulweni, eMvutshini, eGingindlovu.
UMnuz Lindo Ngidi (25) ubulawe ngoMgqibelo ekade esememulweni kwesinye isigodi sangakubo.
Ngokuthola kweSolezwe bekuhlatshiwe ezihlotsheni zikamufi. Kuthiwa usuke emcimbini wakubo waya lapho bekunomemulo khona nokuyilapho ehlaselwe khona abesilisa abahlanu.
Kuthiwa abasolwa bamshaye ngezinduku baze bamgenca ngocelemba bamshiya bethi ushonile.
Umufi uphuthunyiswe esibhedlela wafika washonela khona.
Okhulumela amaphoyisa, uCaptain Nqobile Gwala, uthe kuvulwe icala lokubulala, bathungatha abasolwa.
“Isigameko senzeke eMvutshini ngo-4 ntambama. Umufi oneminyaka engu-25 ubesemcimbini wesintu ngesikhathi eshaywa abasolwa ekhanda. Uyiswe esibhedlela washonela khona. Abasolwa babalekile, amaphoyisa aseGingindlovu avule icala lokubulala. Akekho osaboshiwe,” kusho uCaptain. Gwala.
Ubabomncane kamufi, uMnuz Mphiliseni Ngidi, uthe kubadumazile ukubulawa kukamufi ngesihluku futhi singekho nesizathu.
“Asisazi isizathu sokubulawa kukaLindo ngoba sithole ukuthi uthe efika emcimbini wabe esehlaselwa abanye abafana. Sifisa amaphoyisa aphenye ukuze abasolwa baboshwe ngalesi senzo,” kusho uNgidi.
Kuthe uma uNgidi ebuzwa ngezinsolo zokuthi ukuhlaselwa kukamufi kuhlobene nezimpi zezigodi wathi: “Abafana abancane bezigodi iZimpengo naseMvutshini bebehlezi behilizisana kusukela besafunda bonke esikoleni eMajiya High. Bebehilizisana kodwa bengingakaze ngizitshele ukuthi kungagcina ngokuphuma kwesidumbu.” ULindo kuthiwa ubesebenza eMandeni. Umndeni wakhe uthe yize ungenaso isiqiniseko sokuthi ushaywe ngani kodwa ubenenxeba elikhulu sengathi usikwe ngocelemba kusuka ngasendlebeni kuze kufike ekhanda.
Isolezwe lithole ukuthi isimo asisihle endaweni njengoba abasolwa babonwa bephuma endlini bejaha umsolwa kodwa akekho oboshiwe.
Kukhona novalo lokuthi kungenzeka abesinye isigodi bafune ukuziphindiselela. Amaphoyisa kuthiwa alokhu ezulazula endaweni eqaphe isimo.