Intuthuko ishabalalise imikhuba emibi entsheni
UKUTHWALWA kwezintombi ziganiswe ngenkani sekuzofana nephupho ngaphansi kukaMasipala iDkt Nkosazana Dlamini Zuma njengoba benezinhlelo eziningi ezithuthukisa umphakathi nabathi yizona ezizokwenza intsha ihlale imatasa.
Izindawo ezingaphansi kwalo masipala okubalwa iBulwer, Underberg, Gala, Ngqumeni nezinye, esikhathini esingaphambilini bezikhungethwe yizigameko eziningi zokuthwalwa kwabesifazane abasebancane.
Imeya yalo masipala uNksz Ngeneleni Mncwabe, uthe benze konke okusemandleni ukuqeda lo mkhuba wokuthwalwa kwezintombi.
“Ukuthwala kwezintombi bekuyinto esixakile kodwa ukwandiswa kwezinto ezenziwa ngabantu abasha nokuletha intuthuko kukushintshile kakhulu lokho. Kumanje sinezinkundla zemidlalo lapho abantu abasha bekwazi ukuchitha khona isizungu, sinamathuba emisebenzi kubantu abasha nabesifazane okwenza bangabi wuvanzi. Kuningi abesifazane nabantu abasha abakwenza ngesikhathi sabo,” kusho uNksz Mncwabe.
Uthe ngisho nabantu abadala abebegqugquzela lo mkhuba wokuthwala izintombi sebebonile ukuthi abesifazane bayazisebenzela bazithuthukise, ngakho abasaphoqwa ukuba bagane ngenkani.
Ubuholi kulo masipala bebuhambela izakhiwo nezikhungo ezakhelwe abantu abasha nomphakathi. Kuhanjelwe inkulisa eyakhiwe KwaPitela ngoR1.7 million.
Ilungu lomphakathi uNksz Snenhlanhla Miya (26), lithe le nkulisa izokwenza impilo ibelula njengoba isikhathi esiningi ingane yakhe ubeyishiya nogogo uma esemsebenzini.
“Uma ushiye ingane nomuntu omdala ubuye ungazi noma izomhlupha noma igcine ibaleka ifuna ezinye izingane igcine isidlwengulwa noma ilimala,” kusho uNksz Miya.
Enye indawo ehanjelwe wubuholi kube yihholo lomphakathi elakhiwe eGala ngoR3.5 million.
Kulesi sikhawo esingakaqedwa kube namathuba emisebenzi kubantu bendawo abangu-16.
Omunye wabo othole umsebenzi nguMnuz Mthokozisi Nxele (30). UNxele ubezihlalele ekhaya emuva kokuphothula izifundo zeDiploma kwiIT, eDurban University of Technology (DUT).
“Kusisize kakhulu njengabantu bendawo ukuthola amathuba emisebenzi ngokwakhiwa kwaleli hholo. Ngaphandle kokuthi sesiyakwazi ukuxosha ikati eziko maningi amakhono esiwafundile esizokwazi ukuwasebenzisa ukuziphilisa uma sekuqediwe ukwakhiwa. Singabantu abasha sesiyakwazi ukubheka ikusasa lethu siyeke ukwenza izinto ezingasile njengokuthwala izintombi nokuphuza utshwala,” kusho uNxele.
Leli hholo kulindeleke ukuba liqedwe ukwakhiwa kuwo lo nyaka.
Ezinye izikhungo lo masipala ozakhile yiBulwer Community Service Centre eyakhiwe ngoR15 million, umgwaqo e-Underberg obize ngaphezu kukaR12 million, inkundla yezemidlalo eSawoti okubize ngaphezu kukaR4 million ukuwakha.