ObekwiKings usezoyibamba kwiWits
IBIDVEST Wits ihlabene ngenkunzimalanga kanozinti ozakhele igama eqenjini lesizwe lika-Under 23.
Leli phephandaba selingakuqinisekisa ukuthi uRicardo Goss obengunozinti weReal Kings FC edlala kwiNational First Division (NFD), usayine inkontileka yeminyaka emibili neZitshudeni. Imibiko ebithi uGavin Hunt, ocija iWits, umfuna uthuli lo nozinti iqale ukuvela ngasekupheleni kwesizini eyedlule.
UPhilani Majola oyisikhulu esiphezulu kwiKings, eqeqeshwa uSimo Dladla, izolo uthe ubeseGoli ukuyoqeda konke namaClever Boys ngodaba lukaGoss.
Leli phephandaba libe selithinta uDladla ukuthola ngomphumela walezi zingxoxo. Ukuqinisekisile ukuthi iKings isigqemeke ingozi engeqiwa ntwala njengoba uGoss esesayine inkontileka yamasizini ababili nezikaHunt. “Izinhlelo zami seziphazamiseke ngendlela eyisimanga ngaphambi komdlalo wethu neWitbank Spur ngeSonto. Okungiphatha kabuhlungu ukuthi ubengomunye wabadlali ebengihlela ngaye izinhlelo zomdlalo wethu wokuvula iligi. Nakuba kubuhlungu impilo yebhola injalo, akukho esingakwenza. Bakhona nabanye abadlali bezinga eliphezulu esizoyibamba nabo ishisa.”
KwiWits lo nozinti, owake wavimba nakwiLamontville Golden Arrows, ijezi uzolibanga noDarren Keet noBrighton Mhlongo. KwiKings uDladla uzosala noMlungisi Mazibuko. Akucaci ngoPhilani Zikalala ukuthi uzogcina esayiniswe njengomdlali noma uzoqhubeka nokusiza ekucijeni onozinti.
UDladla uphinde wazisa Isolezwe ukuthi uMosoabi Nkoto waseLesotho obedlala kwiKick 4 Life, engaphansi kweLesotho Premier League, noFaty Papy waseBurundi, owake wadlala kwiZitshudeni, abakawatholi amaphepha okusebenza kuleli.
“Sibheke ukuthi ungashayi oLwesihlanu amaphepha okusebenza kuleli bengawatholanga. Nakubo isimo esifanayo, uma begcina ngokungawatholi sizophoqeleka ukuthi sidlale ngeSonto ngaphandle kwabo,” kubeka uDladla.
Uveze ukuthi kule sizini abaphathi babayalele ukuthi bafake iqembu kwi-Absa Premiership.
UDladla uthe umdlalo weWitbank ozoba seSugar Ray Xulu Stadium, eClermont ubaluleke kakhulu ngoba uzobakhombisa okuningi ngesifiso sabo sokungena kwiPremiership. Imidlalo yeNFD: NgoMgqibelo ngo-3 ntambama: Real Kings v Witsbank Spurs (Sugar Ray Xulu Stadium); Royal Eagles v Stellenbosch FC (Chatsworth Stadium); Uthongangi FC v Tshakuma Tsha Madzivhadila (Princess Magogo Stadium); Maccabi FC v TS Sporting (Dobsonville Stadium)
Ngesonto ngo-3 ntambama: University of Pretoria v Mbombela United (Tuks Stadium); Jomo Cosmos v Ajax Cape Town (Makhulong Stadium); TS Galaxy v Cape Umoya United (Kameelrivier Stadium); Richards Bay FC v Ubuntu Cape Town (uMhlathuze Sports Complex)