KWI-PSL: SOLINAS
‘AKEKHO umdlali ocishe asondele kuKhama Billiat ngethalente kwiPremier Soccer League (PSL)’.
Akwethusi lokhu ngoba kushiwo umqeqeshi wakhe kwiKaizer Chiefs, uGiovanni Solinas. Iqhawe lakho liyakuphika lokhu futhi nomqeqeshi weMamelodi Sundowns ngeke neze akuvume kulandela ukukhombisa kwakhe izimpawu zokunengeka uBilliat eqokwa njengomdlali ovelele iChiefs ivula isizini nompetha beligi iSundowns.
Yebo uPotshoza uyavuma ukuthi uBilliat ubegqame kakhulu iChiefs inqoba kwiFree State Stars koweMTN 8 kodwa ukuthi ubadlula bonke kwiPSL sengathi kuyihaba.
“Angifuni ukubukeka njengomuntu obabukela phansi abanye abadlali abakhona kwiPSL kodwa ngokwami uBilliat uhamba yedwa. Uyena umdlali ongcono kunabo bonke eNingizimu Afrika njengamanje. Phesheya kwezilwandle angafika athi khaxa ngakho-ke ngizishaya isifuba ngokuthi ungumdlali wami,” kusho uSolinas izolo kwiwebsite yeChiefs.
Kuyona le nkulumo uSolinas uveze okunye okumshiye eshaqekile uPotshoza ngoba akuzwakali kahle kodwake iqhawe lakho lazini ngokuqeqesha ngoba lona lizazela ukuhamba lihogela ezishisayo kwiPSL.
USolinas uthe uzomshintsha uSiphelele Ntshangase lapho edlala khona. Uthe uzomsusa ngemuva kwabagadli ambeke eduze kukaWillard Katsande ukuze basizane ngokubamba ibhola. Umbuzo kaPotshoza uthi ubani ozokhiphela abagadli amaphasi njengoba uNtshangase emenzele umsebenzi olula uLeonardo Castro eshaya igoli koweFree State wakamuva?
“Ngizomshintsha impela uNtshangase. Ngiyazi udlala kahle kunombolo 10 kodwa ngizomguqula ngimhlehlise ayodlala eduze kukaKatsande ukuze babambe isisu,” kusho uSolinas.
Selingakusho nje iqhawe lakho ukuthi likulindele lokho ngoba phela eduze kukaKatsande kuyamakwa futhi kudingeka izikhwepha okuyinto uNtshangase angakaze ayenze ngisho esagijima emigwaqweni yaKwaNdengezi.
UNOZINTI weKaizer Chiefs, uVirgil Vries, obe nomdlalo omuhle bebhekene neFree State Stars koweMTN 8, uzohlala amasonto amabili ngenxa yokulimala.
Lezi zindaba zivezwe yiqembu ngoMsombuluko ebusuku.
UVries uthinteke edolweni ngesikhathi evimba ibhola elibi leStars emdlalweni obuseFNB Stadium ngempelasonto.
Ubethole ithuba lokuba sezintini okokuqala kuMakhosi ngemuva kokuthi u-Itumeleng Khune enikezwe ikhefu emva kokulimala kwentombi yakhe uS’bahle Mpisane engozini yemoto ngesonto eledlule.