OwePMB uchazwa oweMan City
UMGADLI weMaritzburg United, u-Andréa Fileccia, uthe imigilingwane nemilingo eyenziwa yinjini yeManchester City, uKevin De Bruyne, ayimethusi nakancane kwazise besakhula kwakuvele kucaca ukuthi uyoba yisihlabani sikanobhutshuzwayo esiyohlonishwa umhlaba wonke.
UFileccia, oke wadlala kwiFeyenoord yaseNetherlands, ube nengxoxo ekhethekile neSolezwe ngokwazana kwakhe nalesi sihlabani seCity, esiyibamba kwi-English Premier League (EPL). UFileccia uzalwa eBelgium, edolobheni iMons.
Elandisa Isolezwe uthe badlale ndawonye noDe Bruyne eqenjini lesizwe lika-Under 23 laseBelgium. Uthe ubengaqali ukumazi ngaleso sikhathi njengoba bebedlala emazingeni aphansi kusuka ku-Under 15.
“Akungethusi esengikubona kuyena manje. Ubengandile ngomlomo kodwa ubedlala ingcwenga yento sisakhula. Ububona ukuthi uya kude nebhola kodwa engaziphakamisi neze. Angichaza ngakho kakhulu wukuthi unomoya ophansi, uyakwazi ukucubungula isitha kahle abone ubuthaka baso. Angisayiphathi eyokuphasa okusezingeni eliphezulu. Mina ubekwazi ukungibona ngingakalibizi ibhola. Bengiwaqeda amagoli sidlala naye,” kuchaza uFileccia efa yinsini.
UDe Bruyne, oke wadlalela iChelsea yase-England neWerder Bremen yaseGermany, ushaye into ecokeme ngesizini edlule kwiCity njengoba benqobe isicoco se-EPL. Abaningi bashaye amakhala ngesikhathi ekhala ngaphansi kuMohamed Salah weLiverpool emklomelweni womdlali ovelele kwi-EPL. Ngokwejwayelekile lo mklomelo utholwa umdlali weqembu elisuke linqobe isicoco seligi.
“Ngiyaziqhenya kakhulu ngaye ngasekuzuzile. Kukhona lokho okuncane kokuthi hleze nami ngabe ngikuleliya zinga kodwa ngibuye ngiziduduze ngokuthi sasingeke siphumelele ngendlela efanayo. Nokho uyangikhuthaza ukuthi ngizinikele ebholeni, nami ngenze konke okusemandleni ukuze ngibonakale. Ngingasho kugcwale umlomo ukuthi ngingumlandeli wakhe wokuqina njengamanje. Ngiyakhumbula nje ngomunye unyaka sidlala neScotland (kwi-Under 23), iwona mdlalo angiphasela kuwona ngadela loya, ngithi ngashaya amagoli ambalwa kuwona uma ngingaphosisi,” kusho uFileccia ongakadlali nowodwa umdlalo kwiMaritzburg selokhu kuqale isizini ngenxa yokulimala.
Ngokusho kukaFadlu Davids, ongumqeqeshi weTeam of Choice, uFileccia uzodlala umdlalo wakhe wokuqala ngoLwesihlanu uma ezakhe sezidudulana neKaizer Chiefs, koweligi, eHarry Gwala Stadium, eMgungundlovu.