ULARSEN WENEME NGEZAKHE
YIZE iLamontville Golden Arrows ithole isibhaxu kwiMamelodi Sundowns, umqeqeshi wayo uClinton Larsen uthe ubona ukukhula eqenjini lakhe.
I-Arrows ihlulwe yiSundowns ngo 2-0 kwi-quarterfinal yeMTN 8. Lona bekuwumdlalo wesibili Abafana Bes’thende behlulwa. Ngaphambi kwawo bashaywe yiBloemfontein Celtic ekhaya kowe-Absa Premiership ngesonto eledlule.
“Angicabangi ukuthi iSundowns ibilindele ukuthi siyihlasele esiwombeni sokuqala. Ukudlalisa uDanny (Venter) esiswini kusisebenzele. Ngiyaziqhenya ngendlela esidlale ngayo. Yebo besingenza kangcono (egolini lokuqala leSundowns), ngale kwalokho ngicabanga ukuthi abadlali benze kahle,” kusho uLarsen. Uthe indlela abangenelwe ngayo amagoli kumele ibe yisifundo. Kwelokuqala elishaywe uSibusiso Vilakazi, iSundowns itholane ngamaphasi phambi kwebhokisi le-Arrows. Abebenikezana ngebhola uGaston Sirino, Themba Zwane laze laphelela kuVilakazi oliqabulise inethi. Kwelesibili, elishaywe uWayne Arendse, Abafana Bes’thende balahle ibhola ngasebhokisini labo. “Amaqembu amahle ayakujezisa uma ulahla ibhola kulezo zindawo. Kodwa lokhu kuyisifundo. Ngibone silinyusile kakhulu izinga uma ngiqhathanisa nomdlalo wethu odlule. Ngibona sihamba kahle, kukhona okuhle esikubonile,” kusho uLarsen. Emdlalweni olandelayo i-Arrows izovakashela iCape Town City ngoMgqibelo eCape Town Stadium ngo-6 ntambama. Ngesizini edlule i-Arrows ibuye namaphuzu amathathu kwiCity iyihlula ngo 1-0 wegoli likaLerato Lamola.