Izolwa nokudilizwa kwabasebenzi iCosatu
PHEZU kokuba uhulumeni eqinise abasebenzi idolo ngokuchitha umbiko wokuthi uhlela ukudiliza abasebenzi abangu-30 000 kodwa umfelandawonye wezinyunyana iCosatu uthi uzoluqapha ngeso lokhozi lolu daba.
NgoLwesibili, uMengameli weCosatu uMnuz Sdumo Dlamini uthe bayazi ukuthi ayinuki ingosiwanga ngakho abezindaba bebengeke bayisusele emoyeni mibiko yokuthi kukhona abasebenzi abazodilizwa.
“Siyajabula ukuthi uhulumeni uthe ngeke abadilize abasebenzi kodwa siyazi ukuthi le ndaba iqalwe wuMnyango wezeziMali okuyiwona ofuna ukunciphisa izindleko.
“Sizoluqapha ngeso lokhozi lolu daba ngoba nakuba uhulumeni ethe ngeke adilize abantu kodwa siyazi ukuthi ufuna izindlela zokunciphisa izindleko. Simbonile enyusa intela yezimpahla ehlohlwa wuMnyango wezeziMali,” kusho uDlamini.
Uthe i-ANC kufanele ikhulume noMnyango wezeziMali ukuze uze nezinye izindlela zokonga imali ngaphandle kokuqeda imisebenzi nokuthwalisa abampofu umthwalo wentela.
“Kunohlelo olubizwa ngeNational Development Plan oluthi uhulumeni kufanele abe esedale amathuba omsebenzi angu11 million ngonyaka ka-2030. Asikuboni kwenzeka lokhu ngenxa yokuthi amathuba omsebenzi awadaleki kunalokho izimayini zisitshela ngezinhlelo zokudiliza abasebenzi,” kusho uDlamini.
Uthe phezu kokufa kwabasebenzi abangu-44 ababetelekela iholo elingcono ngo-2012 kodwa abaphathi bezimayini abafuni ukuthuthukisa impilo yabasebenzi kunalokho bagxile ekubadilizeni.
“Sifuna uhulumeni aqinisekise ukuthi abasebenzi kabadilizwa ezimayini njengoba Impala Platinum ihlela ukudiliza abangu-13 000 kule minyaka emibili ezayo. Sifuna uhulumeni aphoqe izimayini ukuthi zivikele abasebenzi ngoba abaningi basalimala emigodini, ezinye izidumbu azikatholwa kuze kube manje,” kusho uDlamini.
Uphinde waveza ukuthi abahambisani nokuthi izinkampani zikahulumeni ziphathwe yizinkampani ezizimele ngoba lokhu kuzoholela ekudilizweni kwabasebenzi ngenxa yokuthi izinkampani ezizimele zigxila ekwenzeni inzuzo kunokuthi zithuthukise umnotho.
Uphethe ngokuxwayisa uhulumeni ukuthi uma eseqala uhlelo lweNational Health Insurance aqinisekise ukuthi lwenziwa ngendlela ehlelekile ezosiza wonke umuntu waseNingizimu Afrika.