Ubonga izinkundla zokuxhumana obebolelwa umlenze esibhedlela
USIZWE ukukhala ezinkundleni zokuxhumana umlisa okuthiwa ubesebolelwa unyawo esibhedlela iRK Khan engalutholi usizo.
UMnuz Mondli Zuma oselashelwa esibhedlela Inkosi Albert Luthuli Central uthe ngabe usalele embhedeni waseRK Khan engenziwa lutho ukube akazange abhale enkundleni yokuxhumana uFacebook ekhala ngokubolelwa unyawo ebe elele esibhedlela
Uthe ulaliswe esibhedlela ngoJulayi 9 emuva kokuthi ephuke umlenze kathathu.
UZuma uthe uhlinzwe emuva kwezinsuku ezintathu elaliswe esibhedlela, kwathi uma sekufanele adedelwe wabikelwa omunye udokotela ukuthi kufanele ahlinzwe futhi.
“Udokotela wathi akaneme ngendlela engihlinzwe ngayo wathi kungangcono ngiphinde ngihlinzwe kabusha. Ngempela ngibe sengihlinzwa okwesibili. Emuva kokuthi ngihlinziwe udokotela uke wangaba bikho esibhedlela ngoba kukhona la ebekhona. Okungihlukumezile ukuthi odokotela abebekhona bebenganginaki ngoba bethi angisona isiguli sabo,” kusho uZuma.
Uthe ubone unyawo lwakhe seluqala ukonakala kube kungenziwa lutho ukuthi asizwe, walufaka ezinkundleni zokuxhumana udaba lwakhe.
“Emuva kokuthi sengilifake ezinkundleni zokuxhumana kube sekuyima lubhekwa. Ngibone sekufika u-matron nomsebenzi oxhumanisa isibhedlela nomphakathi nomphathi wesibhedlela bezongibuza ukuthi ngilufakeleni udaba kuFacebook,” kusho uZuma.
Uthe kuphele izinsuku ezintathu wathola umbiko wokuthi usedluliselwe esibhedlela Inkosi Albert Luthuli Central. Uthe ukholwa ukuthi ngabe akazange aluthole usizo ukube akazange ayifake ezinkundleni zokuxhumana inkinga yakhe.
Ngaphandle kukaZuma kuthiwa kunezinye iziguli zakulesi sibhedlela esezilinde isikhathi eside ukuyohlinzwa.
Omunye walezi ziguli uMnuz Mazwi Mkhize othe uselinde kusuka ngoJulayi 16.
Uthe ungeniswe esibhedlela ngoJulayi 8, ube esehlinzwa watshelwa ukuthi kufanele aphinde ahlinzwe.
Okhulumela uMnyango wezeMpilo KwaZulu-Natal, uNksz Ncumisa Mafunda, uthe bayazi ngodaba lukaZuma. Uthe wachazelwa ukuthi uzodinga ukunakekelwa okuthe xaxa ngodokotela ngokwezigaba ezahlukene ngenxa yokulimala kwakhe.
Uthe kulindeleke ukuthi Mkhize ahlinzwe namuhla. IKHASI ELIKHOKHELWE