I-Durban Business Fair ibheke e-Bridge City Mall

I-Durban Business Fair (i-DBF) – eneminyaka ewu-20 yempumelelo – iza eBridge City Mall KwaMashu ngale mpelasonto, embukisweni wezifunda waseNyakatho.

Izoqala ngoLwesihlanu, mhla ka-17 Agasti kuya ngeSonto, kanti lona kuzoba wumbukiso wokugcina wezifunda ngaphambi kowamanqamu ongoSepthemba.

I-Durban Business Fair, esingethwe wuMasipala waseThekwini, ihlose ukuthuthukisa amabhizinisi amancane.

Umbukiso uvuleleke kuwonkewonke mahhala kanti kuzoba nemibukiso, ukukhangisa ngengqephu, umbukiso wezemishado, inkundla yezingane, imininingwane ngokwenziwa kwamafilimu nemibukiso nemiqhudelwano yokupheka. Kuzoba khona nezigcawu ze-Business Indaba nese-Business Master Classes.

IPhini leMenenja kuMasipala eQoqweni lezokuThuthukiswa komNotho nezokuHlela, u-Phillip Sithole, lithe uhlelo lwe-DBF wukunika amabhizinisi asafufusa amathuba, abone namathuba akhona kuMasipala.

USithole uthe osomabhizinisi abeza kulo mbukiso bazohlomula ngokuphindwe kane. “Uma uwusomabhizinisi, uzokwazi ukuhlangana ngqo namakhasimende akho njengoba umphakathi ungena mahhala.

“Kuzoba nezigcawu zosomabhizinisi ngezihloko ezehlukene njengosizo lukahulumeni kosomabhizinisi nezinhlelo zohulumeni basekhaya, owesifundazwe nokazwelonke.

“Okwesithathu wukuthi amabhizinisi azothola ithuba lokuhlangana wodwa, njengoba kuzoba nezinkumbi zamabhizinisi azobe ekhangisa, ukuze acobelelane ngolwazi akwazi ukudingida ngokubambisana nangezinye izinhlelo.

“Okwesine wukuthi amabhizinisi azoza kulezi zigcawu azokwazi ukuhlangana namanye amabhizinisi azobe ekhona, kanjalo nezikhulu zikahulumeni ezineqhaza ekwesekeni amabhizinisi,” kusho uSithole.