Sifuna inyama yenkukhu ingabi neVAT – Sapa
I-SOUTH African Poultry Association (Sapa) ithi izokhankasela ukuthi inyama yenkukhu ingabi nentela yezimpahla, iValue Added Tax (VAT) emuva kokuthi ingafakwanga ohlwini lwempahla okungafanele ikhokhe le ntela.
UMnuz Marthinus Stander oyilungu leSapa uthe baphoxekile ukuthi inyama yenkukhu ayifakwanga ohlwini lwempahla engayikhokhi iVAT yize kuyiyona nyama etholakala kalula ngisho nangabampofu.
“Sifuna inyama yenkukhu ibe sohlwini lwempahla engayikhokhi iVAT ngoba ucwaningo olwenziwe yiPricewaterhouseCoopers (PWC) lukhombisa ukuthi imindeni eminingi idla inyama yenkukhu eNingizimu Afrika ngisho leyo empofu,” kusho uStander.
Uthe uma inkukhu ifakwa ohlwini lwempahla engayikhokhi iVAT kusho ukuthi abampofu bazohlomula ngoba bathenga yona kakhulu.
“Sifuna kube yinyama yenkukhu enethambo engakhokhi iVAT ngoba abacebile bavamise ukuthenga le engenalo ithambo.
“Ngeke kuhlomule abafuye izinkukhu kuphela ngalesi sinyathelo kodwa kuzohlomula abathengi ikakhulu okuyibona abathwele kanzima ngokunyuswa kweVAT iye ku-15%,” kusho uStander.
Uthe ukungafakwa kweVAT enyameni yenkukhu kuzosiza ukufaka uR1 billion esikhwameni sikahulumeni kudale namathuba omsebenzi angu-11 176 abantu abangenawo amakhono abazodingeka embonini yenkukhu.
Khonamanjalo isazi sezentela sakwaMazars, uMnuz Tertius Troost, sithe ithimba likaSolwazi Ingrid Woolard ebelibheka impahla okufanele ingayikhokhi intela lenze umsebenzi oncomekayo ngokufaka amaqakelo kulezi zimpahla.
“Ithimba lenze kahle ngokungafaki inyama yenkukhu ohlwini olungafanele ukukhokha intela ngoba ukube liyifakile iNingizimu Afrika ibizolahlekelwa wuR3 billion wentela. Zonke lezi zimpahla ezikhishiwe bezifaka uR4 billion wentela zihlangene kodwa inkukhu ingenisa imali eningi,” kusho uTroost.
Uthe yize isinkwa esimhlophe singenawo umsoco ofana nowesinkwa esinsundu kodwa bekubalulekile ukuthi naso sifakwe ohlwini ngenxa yokuthi sidliwa ngabantu abaningi baseNingizimu Afrika.
Ugqugquzele uhulumeni ukuthi aqinisekise ukuthi inhlangano ebhekelele ukuncintisana okuhle iCompetition Commission isiqapha ngeso lokhozi isimo ukuze izinkampani zingasebenzisani ekubiziseni ukudla ukuze zidlulisele izindleko kubathengi uma zenza inzuzo.