UTade akanayo ingcindezi yokushaya amagoli kuSuthu
AKAZIFAKILE ekhanda izinombolo zokushaya amagoli afike nazo eNingizimu Afrika umgadli waMaZulu FC, u-Emiliano Tade, odabuka e-Argentina.
UTade ubedlala eNew Zealand lapho eshiye iqembu abelidlalela i-Auckland City eyishayele amagoli awu-38 emidlalweni ewu-50.
Indaba yokushaywa kwamagoli ebholeni laseNingizimu Afrika ihlezi isematheni ngenxa yesibalo esiphansi esibonakalayo kwiAbsa Premiership.
Ngakho kungenzeka ukuthi kukhona ababona uTade engaba yisixazululo kuMaZulu elekelelana nabagadli abebevele bekhona, uSiyabonga Nomvethe, Mabhuti Khenyeza, noMhlengi Cele.
“Cha, cha, cha anginayo ingcindezi,” kube yimpendulo kaTade.
“Ngisho iqembu alizange lingenze ngizizwe nginengcindezi yalokho. Ngiwuhlobo lomuntu ongazifaki izinombo ekhanda lakhe. Ngisebenzela iqembu ngokubambisana nozakwethu. Ngiyakholelwa ekutheni kunoma yiliphi iqembu kuhlezi kuzoba khona abadlali abazokhuphula izinga ukuze liphumelele noma kube khona elikuzuzayo. Uma ngiba ngomunye wabo ngizojabula. Uma futhi ngingeyena kodwa iqembu liphumelela nalokho kuzongijabulisa.”
Lo mdlali utheleke ejimini yaMaZulu ezihambela ngesithuthuthu. Usuthu belulungiselela ukubhekana neFree State Stars emdlalweni weligi ongeSonto eKing Zwelithini Stadium, eMlaza, ngo-3 ntambama.
Uthe konke asakubonile kwelikaBhanana kuyafana nempilo yase-Argentina.
“Kusahamba kahle konke, angisho nje ebholeni kuphela. Ngiyafunda okuningi ngosikompilo lwalapha nangomlando weqembu. Wonke umuntu eqenjini ungenze ngazizwa ngamukelekile,” kusho uTade ophendule intatheli ngokuthi “ngiyaphila” ngesikhathi imbuza impilo ngaphambi kokuqala ingxoxo.
Uthe ngesikhathi ehlelela ukuza kuleli uthole nezeluleko “kumngani wami omkhulu”, uRyan De Vries ozalwa eKapa abebedlala naye kwiAuckland City.
Mayelana nemidlalo yabo ezayo uthe kusemqoka ukuthi bazibambe ziqine. UTade udlalile Usuthu lubhekene neBaroka FC. Ubesebhentshini kodlule behlulwa iSuperSport United ngo 1-0.
“Lowo mdlalo (weBaroka) ubunzima. Bekuliwa inkundla yonke kodwa bekuyindlela yokuthi ngijwayele iligi yalapha futhi ngikwazi ukutholana nozakwethu. Okusemqoka wukuthi ngifunde kukhona, ngikhule.
“Ngibona ukuthi kukhulu esisengakwenza njengeqembu. Iseyinde iligi. Kuzomele siqine emiqondweni. Ngikholwa wukuthi uma sikholelwa kithina kuningi esingakuzuza,” kusho uTade.