Irekhodi le-UJ limnika ithemba uMalungwana
IREKHODI elihle uma bebhekene ne-University of Johannesburg (UJ) limnika ithemba, uSifiso Malungwana, unozinti weqembu lebhola lase-University of KwaZulu-Natal eliwukudla kwenduku kwiVarsity Football Cup.
Namuhla ezikaMalungwana, obuye abe ngunozinti weLamontville Golden Arrows, zizotholana phezulu ne-UJ koweVarsity Football Cup ngo-6.30 ntambama eHoward College Rugby Stadium, eThekwini.
Kuyiwa kulo mdlalo isimo simapeketwane kwi-UKZN esahlulwe kuyona yomithathu emidlalweni yeVarsity Football Cup.
Kulesi sikhashana kuqalwe imidlalo yale ligi yezikhungo zemfundo ephakeme, iKZN eqeqeshwa uSam “Stayles” Mkhize, ngokubambisana noLindani “Mantaye” Shezi noSimo Mkhize, selingenelwe ngamagoli ayisithupha.
Emdlalweni wokuqala laguqiswa iWits ngo-2-0 lase liphindwa yiNorth West University (NWU) ngesibalo samagoli afanayo. Nasemdlalweni wokugcina lishaywe yi-University of Pretoria (UP Tuks) ngawo u 2-0.
Ngaphambi kwale midlalo i-UKZN beyithwelwe ngeqoma ngenxa yokunqoba inkomishi ye-University Sport of South Africa (USSA) National Championships.
UMalungwana, odlale imidlalo eminingi kuMaZulu FC nakwiMultichoice Diski Challenge (MDC), uthe nakanjani namuhla bazonqoba. Uthe okubashayile emidlalweni edlule wukuthi bebengakasijwayeli isitayela sokudlala kwiVarsity Football Cup.
Uqhube wathi okunye obekuyinkinga wukuthi bebedlala namaqembu ahlanganiswe kumasizini edlule. Bona bahlanganiswe ekuqaleni kwalo nyaka kwazise kungokokuqala bedlala kule midlalo.
“Ngikholelwa ekutheni sesisibambile isitayela sokudlala kwiVarsity Football Cup. Uma uzoqaphelisisa sidlala kahle bese sishaywa yizinto ezimbalwa. Umdlalo wethu ne-UP Tuks empeleni bekufanele siwunqobe kodwa sashweba amathuba. Abalandeli bethu mabangadinwa, kulo mdlalo wanamuhla sizobajabulisa,” kubeka uMlungwana odabuka eManguzi, KwaMhlabuyalingana.
Uthe okunye okumjabulisayo ngomdlalo wanamuhla wukuthi ne-UJ yazi kahle kamhlophe ukuthi kayilungi kubona. Ngonyaka odlule emqhudelwaneni i-USSA National Championships i-UKZN yayiwashisa ijezi kuma-quarter final. Nakulo nyaka emidlalweni ebisePort Elizabeth, e-Eastern Cape, leli qembu likuphindile lokho liyikhipha i-UJ esigabeni esifanayo.
“Okuhle wukuthi siyazi njengoba sizazi i-UJ. Iyiqembu eliyingozi, yingakho lilele endawwe yesibili kwi-log. Nakuba kunjalo isifike ekugcineni,” kubeka lo nozinti.