I-Argentina enhlanhleni kweyeSuper Rugby

UKUFAKWA eqoqweni elilodwa kwamaqembu aseNingizimu Afrika neJaguares emqhudelwaneni iVodacom Super Rugby, kungenzeka kunike amandla i-Argentina uma isibhekene namaBhokobhoko emdlalweni weRugby Championship eKings Park Stadium, ngoMgqibelo ngo-5 ntambama.

IJaguares ibiseqoqweni elibizwa ngeSouth African Conference kwiSuper Rugby. Amanye amaqembu abekuleli qoqo yi-Emirates Lions, Cell C Sharks, DHL Stormers, neBlue Bulls wonke okungamaqembu akuleli.

Lokhu kungahumusheka ngokuthi amaPumas ase-Argentina anolwazi ngabadlali bakuleli, isimo sezinkundla nokunye. UGuido Petti oyi-lock ye-Argentina, uthe nakuba benolwazi ngesimo saseNingizimu Afrika, kwazise badlale eKapa, eGoli naseThekwini kwiSuper Rugby, lokhu akusho ukuthi kuzoba wumdlalo olula uma sebebhekene namaBhokobhoko ngoMgqibelo.

“Abaningi bazitshela ukuthi kuzoba lula ngoba siyabazi abadlali kodwa kufanele sikhumbule ukuthi nabo bayasazi. Engikubona kuzosisiza wukuthi ingqwaba yabadlali bethu idlala kwiJaguares, ngakho siyazana. Engikwesaba kakhulu wukuthi kungenzeka sikhathale ngoba sidlala imidlalo eminingi singekho ekhaya, okusho ukuthi sichitha isikhathi esiningi sigibela,” kusho uPetti.

I-Argentina imangaze abaningi iphuma kowandulela owamanqamu kwiNdebe yoMhlaba ngo-2015. Ishaye into ephansi ngesizini edlule kwiRugby Championship ishaywa yonke imidlalo eyisithupha.

Ngokukleliswa i-Argentina isendaweni ka-10.

“IRugby Championship idlalwa ezingeni eliphezulu. Kulokhu asifuni ukuphoxa njengokwedlule,” kuphetha uPetti.