OweBaroka ukhala ngobuthuntu babo
ISIBABULI somdlali weBaroka FC, uTalent Chawapiwa sibona sekushoda ukuliqabulisa inethi kuphela ibhola endleleni abadlala ngayo.
UChawapiwa uqokwe waba ngumdlali ovelele ngemuva kokubambana kweBaroka ngo 1-1 neKaizer Chiefs emdlalweni we-Absa Premiership ePeter Mokaba Stadium ngoLwesibili ebusuku.
Empeleni iBaroka ibingawathatha amaphuzu amathathu kulo mdlalo njengoba iwakhile amathuba ikakhulukazi esiwombeni sesibili kodwa yehluleka wukuthola igoli lesibili. Elokuqala layo kube umkhonto ogwaze ekhaya ngoRicardo Cardoso. USiphiwe Tshabalala ushayele iChiefs elokulinganisa ngaphambi kokuthi kuyiwe ekhefini.
“Ngicabanga ukuthi senze kahle ngenxa yokulandela imiyalelo yomqeqeshi. Usidonse ngendlebe ngokuthi singayihloniphi iChiefs, uma senze njalo singakwazi ukuthi siwunqobe umdlalo,” kusho uChawapiwa obefunwa yiChiefs kodwa zenqaba izikhulu zeBaroka.
IBaroka isinamaphuzu amane emidlalweni emithathu. NgoMgqibelo izoqhuthana nePolokwane City kowabakhaya baseLimpopo. Umdlalo usePeter Mokaba Stadium ngo-3 ntambama.
“Kuyona yonke imidlalo yethu sidlala kahle kodwa sibuthuntu ekuqedeleni amathuba. Kuzomele sisebenze ekukulungiseni lokho ngaphambi komdlalo wethu olandelayo,” kusho uChawapiwa obese kungokwesibili ethatha owomdlali ovelele. NgoLwesibili ubemthwalise kanzima uRamahlwe Mphahlele weChiefs lapho ebegeleza khona bese agobe amabhola ayingozi.
Umqeqeshi weBaroka, uWedson Nyirenda, ukugcizelele ubumqoka bokushaya amagoli.
Njengoba bezobe bebhekene neCity uthe: “Umdlalo weChiefs usudlulile. Sikwenzile obekumele sikwenze iChiefs yagcina iphume nephuzu. Umdlalo wePolokwane kuzomele siwuhlelele ngenye indlela. Owabakhaya, akekho ozobe efuna ukuhlulelwa ekhaya. Nakanjani kuzoba umdlalo ovuthayo.”
Uthe bebekulindele ukuthi iChiefs izobathwalisa kanzima.
“Inkinga wukuthi siyivulele izikhala zokudlala ikakhulukazi esiwombeni sokuqala. Bekusemqoka ukuthi sibavale. Kwesesibili siwakhile amathuba amanye amabhola ashaya ipali. Ngokubona kwami siya ngokukhula,” kusho uNyirenda owayegijima kuMakhosi eminyakeni edlule.
ICity izoza emdlalweni weBaroka ingakatholi nelokubika iphuzu emidlalweni emibili.
Ivule iligi ngokushaywa ngomakhelwane iBlack Leopards ngo 1-0. Ngemuva kwalokho ithelwe phansi iMamelodi Sundowns ngo 2-0.