Luzoqukatha ingxubevange uhlelo olusha iBhola Lethu
NGEKE bagxile kakhulu kokwenzeka kwiPremier Soccer Leagaue (PSL) ohlelweni olusha lakwaSuperSport oluzosakazwa ngolimi lwesiZulu nesiSotho njalo ngoMsombuluko oluzokwaziwa ngokuthi iBhola Lethu.
UBaba Mthethwa noPhumlani Msibi okuyibona abazokwethula lolu hlelo bebekhona izolo emini lapho lolu hlelo oluzoqala ngo-Agasti 20 ngo-7 ebusuku, belwethulwa khona ngokusemthethweni eMorningside, eThekwini.
“Sizoqinisekisa ukuthi ngisho izizukulwane ziyabazi abadlali bethu bakudala. Le nto yokubakhohlwa isiphelile manje. Sizozungeza yonke indawo sithungathe izinkakha ukuze siziveze emehlweni omphakathi,” kusho uMsibi.
UMthethwa uthe: “Sizoya ezidindini nasemaqaqasini ukuyovumbulula ithalente ukuze siliveze obala. Yebo kusemqoka ukuvezela abalandeli bethu lokhu abangakuboni ngesikhathi semidlalo (ama-video akhethekile). Sizobheka futhi ukuthi amaqembu enzani. Le ndaba yokuqasha nokuxosha sizoyibhekisisa ukuthi imigudu efanele iyalandelwa noma cha. Sizoba yiso labantu bethu abakhuluma izilimi zesiNguni.”
USifiso Mbambo ongumdidiyeli wezebhola kwaSuperSport uthe akukho abazokwenza ukusiza abadlali abazobe sebebavezile, ube esephonsela amaqembu inselelo ngokuthi angaliyeki leli thuba.
“Konke kukubanikazi bamaqembu. Okwethu ukulizela ithalente.”
Lesi sikhulu siphinde savula isifuba ngesifiso saso sokusakaza bukhoma imidlalo yeqembu lesizwe lakuleli lebhola, iBafana Bafana.
UMbambo ukhuluma kanjena nje kusanda kuvela izindaba zokuthi imidlalo yeBafana Bafana neBanyana Banyana ngeke isasakazwa kwaSABC njengoba ibhekene nenkinga yemali. Njengamanje iSupersport ayinawo amalungelo okusakaza imidlalo yeBafana Bafana, iSABC njengomsakazeli womphakathi iyona enelungelo lokusakaza imidlalo yamaqembu esizwe.