Kugcizelelwe eyokonga enkonzweni kaPro
IPHENDUKE inkundla yokuqwashisa abaculi be-hip hop ngokusebenzela impumelelo kanjalo nokuphatha kahle imali inkonzo yesikhumbuzo yomculi uLindani “Pro” Mkhize (37), owaduma ngelikaProkid odlule emhlabeni ngoLwesithathu olwedlule.
UPro ubekhunjulwa enkonzweni ebikade iseBassline, eNewtown, eGoli, izolo ntambama.
Ethula inkulumo yokuvalelisa kuPro, uSlikour owazakhela udumo kwiSkwatta Kamp ukhulume waze weqa nesikhathi abekade ebekelwe sona.
“Kufanele abaculi basebenzele impumelelo engaphezu kweyomculo. Kumele sisebenzele ukuzithuthukisa, sibheke phambili. Kubalulekile nokuthi imali siyisebenzise ngendlela, singavele siyibhubhudle.
“Imboni yomculo we-hip hop neyamatekisi kungokwabantu abamnyama kodwa ngokuthi asifundisekile ngokusebenzisa imali, kugcina kungathuthuki. Sigcina sifaka imali kwezinye izizwe kodwa thina asiyi phambili,” kusho uSlikour. “Ngicela noma ubani aphume lapha ezimisele ukwenza ushintsho empilweni. UPro uhlanganise abaculi abanye abangahoshelani. Sine-group kaWhatsapp yabaculi be-hip hop, kuyakhulunywa. Ngithemba ukuthi kukhona okuzokwakheka ngalokhu okuzohlomulisa abaculi be-hip hop ukuze babambisane.”
UT-bo Touch wengeze emazwini kaSlikour wathi ukholwa wukuthi ubumbano oluvelayo ngokuhamba kukaPro kubaculi be-hip hop. Bekugcwele abathandi be-hip hop abebezovalelisa kulesi silomo samanoni okukhona kuwona ethi Uthini Ngo Pro, Wozobona, Soweto, Dankie San okugcine sekuqanjwe ngayo ilebuli yezimpahla zokugqoka.
Kubaculi abebekade behambele inkonzo kubalwa uSjava, Kwesta, KO noMa-E bodumo lweqembu iTeargas, Mshoza, Eugene wodumo lweqembu i-Trompies, Maggs, Slikour oyilungu leSkwatta Kamp. Kwabezepolitiki bekukhona umholi we-EFF uJulius Malema noZizi Kodwa we-ANC.
UPro uchazwe njengomuntu obekukhathalele ukuthuthukisa amakhono abanye abaculi ikakhulukazi abe-hip hop baseSoweto namaphethelo.