Kume ukufunda kushaywa umfundi
KUME ukufunda esikoleni samabanga aphansi iBongumusa Primary, Emaphephetheni, ngaseNdwedwe, emuva kokushaywa komfundi (16) wakhonjwa ngesibhamu ngoba esolwa ngokweba iselula kathisha.
Abazali bezingane zakulesi sikole batheleke esikoleni izolo kwaphazamiseka ukufunda kugodukiswa izingane ngesikhathi bezothola ngesigameko sokushaywa nokukhonjwa ngesibhamu komfundi ofunda uGrade 7 igama lakhe ligodliwe. Lo mfundi kuthiwa ushaywe wothisha nonogada wesikole wase elandelwa abantu abahlobene nomunye wothisha bamshaya ngoba esolwa ngokweba iselula okuthiwa inyamalale esikoleni ngoMsombuluko. Kuthiwa kufike abalisa ababili esikoleni, oyedwa obehlome ngesibhamu, wakhomba umfundi ngaso esiphongweni waphinde wamshaya kaningi ethi akakhiphe iselula kathisha okuthiwa ubesaqeqeshelwa ubuthisha.
Umkhulu womfundi, uMnuz Jerome Buthelezi, uthe kufike uthishanhloko wesikole neHOD emzini wakhe ngoLwesibili emini bethi bacela eze esikoleni bezoxoxa.
“Bangitshele ukuthi kulahleke iselula futhi umzukulu wami uyasoleka ekulahlekeni kwayo. Ngibe sengibatshela ukuthi umzukulu wami ubengekho esikoleni ngosuku okuthiwa kulahleke ngalo iselula kodwa ngathi ngizohamba nabo ngiyozwa kahle indaba esikoleni,” kusho uButhelezi.
Uthe ngesikhathi befika othisha babize umzukulu wakhe nomunye umfundi ofunda uGrade 5 okuthiwa nguye owebe iselula ngoba ethi uthunywe ngumzukulu wakhe.
UButhelezi uthe ucele kothisha ukuthi kulandwe amaphoyisa uma kuwukuthi bakholwa wukuthi uyebile iselula umzukulu wakhe ukuze udaba luphathwe ngabomthetho.
Uthe abazange bamlalele kodwa babize unogada wesikole othe umzukulu wakhe uzoyikhipha iselula.
UButhelezi uthe umzukulu obekusolwa ukuthi uyidayise e-car wash ebuqamama nesikole iselula ubacele ukuthi baye kuyona babuze ukuthi ufikile yini ukuyoyidayisa nokuyilapho betshelwe ukuthi akafikanga.
Uthe unogada ube eseshaya umzukulu wakhe baphinde babuyela naye esikoleni bamshaya kwaze kwafika nabantu abahlobene neHOD yesikole bamshaya bamkhomba ngesibhamu kuthiwa akakhiphe iselula. Uthe uzobavulela icala.
Izolo abazali bebeshisa amathayi esikoleni bethi abamfuni uthishanhloko.
Omunye wabazali uthe babona uthishanhloko ebudedengu ngokuvuma ukuthi ingane ishaywe ngalolu hlobo isolwa nokuthi avumele abantu bangaphandle bangene esikoleni nesibhamu bakhombe ingane ngaso.
Kuthiwa uthishanhloko ugcine esephelezelwa amaphoyisa abeqhumisa izibhamu ehlakaza abazali abebevutha bethi abamfuni uthishanhloko.
Okhulumela uMnyango wezeMfundo, uMnuz Sihle Mlotshwa, uthe bayakugxeka ukushaywa komfundi ngalolu hlobo.
Uthe isikole nesikole sinemigomo okufanele siyilandele uma kukhona abasolwa ngakho abafundi nokungewona lona olandelwe yisikole.
“Sizocela umbiko esikoleni bese siyaqinisekisa ukuthi kwenziwa ubulungiswa. Sicela ukuthi abazali behlise umoya ngesikhathi sisabheka lolu daba,” kusho uMlotshwa.
Isolezwe lithole ukuthi abanye bokufika nabo bangenelelile bezama ukulwela owokufika kuleli.
Oyedwa ugcine edubuleka waphuthunyiswa esibhedlela.
Okhulumela amaphoyisa KwaZuluNatal, uLt Col Thulani Zwane ukuqinisekisile ukuthi kukhona icala lokushisa eliphenywayo.
“Yize singakabi nasiqiniseko sokuthi zingaki izitolo ezishisiwe, kodwa kukhona icala esiliphenyayo lokushiswa kwesitolo. Kukhona nowesilisa odubulekile. Uphuthunyiswe esibhedlela. Amaphoyisa ayaphenya, imbangela ngalezi zigameko ayaziwa,” kusho uZwane.
Isolezwe izolo ntambama lithole ukuthi isimo besimanzonzo emphakathini.
Ilungu lomphakathi elikhulume neSolezwe kodwa langathanda ukudalulwa lithe isimo asisihle endaweni.
“Asazi noma siphephile yini njengoba kunesixakaxaka. Isitolo esingakwaGwala sishisiwe, nesinye esiseduze kwale ndawo. Yize ngingazi kahle ngesizathu kodwa sithole ukuthi kunowokufika onesitolo obefuna isikweletu sakhe kwasuka impi,” kusho ilungu lomphakathi.