Kufufusa iziteleka ngenxa yezinkinga zeNSFAS
ZIYAQONGA izinkinga ezibhekene nesikhwama esixhasa izitshudeni ngemali ezikhungweni zemfundo ephakeme njengoba abaholi bezitshudeni besabise ngombhikisho obhekiswe kwiNational Student Financial Aid Scheme.
Lokhu kulandela ukuphumela obala kweNehawu yathi namhlanje izoqhinqa emahhovisi alesi sikhwama ifuna kusule isikhulu esiphezulu salesi sikhwama uMnuz Steven Zwane.
UMengameli weSouth African Unions of Students (SAUS), uMnuz Meshack Mugabe, utshele ikomiti lemfundo ephakeme ePhalamende izolo ukuthi isiqalile imibhikisho kwezinye izikhungo ngendaba yeNSFAS.
Uthe emanyuvesi aseVenda, Limpopo, Mpumalanga seziqalile iziteleka.
“Kufufusa iziteleka kuzwelonke ngendaba yeNSFAS nokungakhishwa kwemihlomulo yezitshudeni. Izitshudeni ziyakhishwa ezindlini, azidli azikwazi nokuthenga izincwadi ngoba azikhokhelwe,” kusho uMugabe.
Usho lokhu nje nasophikweni lwaseWestville, enyuvesi yaKwaZulu-Natal kulindeleke ukuthi kuvulwe namhlanje ngemuva kwesiteleka sezitshudeni ebezikhala ngeNSFAS.
UMengameli weSouth African Further Education and Training Student Association (Safetsa), uMnuz Yonke Twani, unxuse ukuthi lesi sikhwama sibe kuzona zonke izifundazwe ukuze izitshudeni zithole usizo kalula.
Kulo mhlangano kuvele ukuthi kuzovulwa ngenyanga ezayo ukufakwa kwezicelo zezitshudeni ezifuna uxhaso ngonyaka ozayo. UZwane uthe uyakweseka ukuqokwa komlawuli athe uzosiza bathole umsuka wezinkinga kulesi sikhwama. Uthe banengwadla yokushoda kwabasebenzi. USihlalo wekomiti, uNkk Connie September, uthe nakuba kukhona abangakhokhelwanga nyakenye kodwa bathole ukuthi imali yanikwa amanyuvesi ekuqaleni kwekota yalo nyaka. “UZwane ukhale kakhulu ngokuthi izinkinga zokungakhokhelwa kwezitshudeni zidalwe wuhlelo lokuzixhasa ngqo okugcine kutholakale ukuthi alusebenzi. Siyabonga kuzona zonke izinhlaka ezizama ukuqhamuka nesisombululo kulezi zinkinga. Silinde kuqokwe umlawuli umnyango othembise ukuthi uzoqokwa ukulungisa isimo kulesi sikhwama,” kusho uNkk THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. September.
USolwazi Belinda Bozzoli we-DA ukhale ngokuthi zingu-75 000 izitshudeni ezingakatholi uxhaso nakuba sezithenjisiwe.
Uthe amanyuvesi avivela imibhikisho yezitshudeni kanti mahlanu manje anemibhikisho.
“Lesi sikhwama siveze ukuthi sibhekene nezinkinga ezithinta ubuchwepheshe. Kuvele nokuthi izitshudeni ezingu-22 800 ezixhaswe nyakenye zagcina zingasayinanga amafomu esivumelwano soxhaso ekubeni zabhalisa zafunda.”
Uthe kumele kugxekwe owayengumengameli uMnuz Jacob Zuma ngokuthembisa imfundo yamahhala noMengameli Cyril Ramaphosa ngokungamisi lolu hlelo kuze kulungiswe zonke izinto.
I-Education for Social Justice Foundation ithe iyalweseka ikhwelo leNehawu lokuthi uZwane ehle esikhundleni ngoba wehlulekile.