Iphoyisa libanjwe oqotsheni ligwazisa ngoR10 000
LUKHWIBIKILE ugwibi zasha ephoyiseni elisebenza esiteshini sase-Sydenham, eThekwini, elibanjwe oqotsheni “ligwazisa” ngoR10 000 ukuze “licishe” icala lokukhwabanisa.
Iphoyisa elingu-Constable liboshwe ngoLwesithathu wuphiko oluphenya amacala athinta amaphoyisa, i-Ipid.
Okhulumela i-Ipid, uMnuz Moses Dlamini, uthe iphoyisa lifune ngodli imali kobebhekene necala lokukhwabanisa.
“Umsolwa, obevele esecushiwe, uboshwe eseyithathile imali. Uphenyo luveza ukuthi umsolwa uye kobebhekene necala lokukhwabanisa wafuna uR10 000 ukuze icala liphele. Uboshwe nawo uR10 000. Uzobhekana necala lenkohlakalo,” kusho uDlamini.
Icala lokukhwabanisa abebekwe lona ofunwe imali yiphoyisa lihoxisiwe enkantolo ngoba ubufakazi bungahlangani.
Iphoyisa kuthiwa liye kobebekwe icala lamtshela ukuthi uma engafuni alibuyise enkantolo icala kuzomele alikhokhele.
Lithe ngoR10 000 lizoqinisekisa ukuthi icala aliphinde libuyiswe enkantolo. Iphoyisa lizovela maduze enkantolo.
Khonamanjalo, uNgqongqoshe wamaphoyisa, uMnuz Bheki Cele, ngoLwesithathu ekhuluma nekomiti elibhekelele ukusebenza kwamaphoyisa ePhalamende, uthe mahlanu amaphoyisa aboshiwe athinteka emacaleni okubamba inkunzi izimoto zemali.
Uthe lokhu kwenzeke esikhathini esingamahora awu-24.
Akazange ande ngokuthi angobani amaphoyisa aboshiwe nokuthi azovela nini enkantolo.
UCele uthe kuyamdumaza ukuthinteka kwamaphoyisa emacaleni.
Kusasa kulindeleke ukuthi avakashele eManguzi ukuze anikeze umphakathi umbiko ngamacala okweqa umngcele ngaphandle kwemvume namanye amacala abekhathaza abantu baseManguzi.