Udlwengulwe nendodakazi yakhe ekade engcwaba ubaba wekhaya
USEYAGADWA umfelokazi nendodakazi yakhe abangenelwe abantu abangaziwa babadlwengula bathatha nemali yesoso engu-R7 000 namaselula eMtikini eManguzi.
Lo mndeni, okungowesifazane oneminyaka engu-57 nendodakazi yakhe ena-37 abangeke badalulwe, uhlaselwe ngeledlule emuva kokungcwaba ubaba wekhaya.
Lokhu kuthiwa kwenzeke sekuhambe izihlobo ebezizobasiza ngokufihla ubaba wekhaya.
Ngokuthola kweSolezwe, ngo-9 ebusuku kufike abasolwa ababili bavula ngenkani emnyango behlome ngocelemba.
Owesifazane ozilile kuthiwa uhudulwe omunye umsolwa wamyisa ehlathini eliseduze lapho afike wamdlwengula khona ephindelela.
Indodakazi idlwengulwe egcekeni kubo ngoba ibilwa nomsolwa. Kuthiwa ngenxa yokuthi ibilwa nomsolwa ube eseyigenca ezandleni yalimala kanzima. Yize zingazange zinqamuke izandla zayo kodwa kuthiwa ayikwazanga nokusayina isitatimende samaphoyisa ngenxa yokulimala. Kuthiwa ibigencwa ngocelebha ezandleni.
Okhulumela amaphoyisa KwaZulu-Natal, uCaptain Nqobile Gwala, uthe umsolwa oyedwa uboshiwe basathungatha omunye.
“Abasolwa bafike badlwengula abesifazane ababili, bathatha imali namaselula babaleka nako. Amaphoyisa aseManguzi avule icala lokudlwengula, nelokuntshontsha. Umsolwa oneminyaka engu-23 uboshiwe kulesi sigameko,” kusho uCapt Gwala.
Umsolwa uvelile enkantolo KwaNgwanse ngoMsombuluko. Icala lihlehliselwe uMsombuluko ozayo.
“Umsolwa oyedwa sisamthungatha silandela umkhondo,” kusho uCapt Gwala.
Isolezwe lithole ukuthi emuva kwalesi sigameko amalungu omphakathi aseyashintshana agada amalungu omndeni ukuba angahlaselwa.
Imizamo yokuthola umndeni ohlaselwe ayizange iphumelele izolo ngoba izinombolo zawo bezivaliwe.