UMolefe ubhalele uGama ethi uzomiswa emsebenzini
USIHLALO weBhodi yakwaTransnet, uDkt Popo Molefe, ubhalele isikhulu esiphezulu senkampani, uMnuz Siyabonga Gama, incwadi emazisa ukuthi uzomiswa emsebenzini.
Izolo uMolefe uphinde wabhalela ezinye izikhulu ezimbili zakwaTransnet, oMnuz Thamsanqa Jiyane noNkk Lindiwe Mdletshe.
Esitatimendeni uMolefe uthe uyazimisa izikhulu ngenxa yezinsolo zokungaziphathi kahle eziqukwethwe embikweni owenziwe ngabameli oveza ukuthi zaphula imithetho ethile.
Abameli abaveza ukuphulwa komthetho ngabakwaWerksmans Attorneys, Mncedisi Ndlovu & Sedumedi Attorneys neFundudzi Forensic Investigators.
“Ibhodi lihlela ukumisa izikhulu kuze kube kuqedwa uphenyo ngokuphulwa komthetho. Okuvelile wukuthi kuphulwe umthethosisekelo, iPublic Finance Management Act (PFMA), owokuthengwa kwempahla, iPreferential Procurement Policy Framework Act (PPPFA), umthetho wokuthengwa kwempahla wangaphakathi eTransnet neminye ethinta ukuthengwa kwempahla eNingizimu Afrika,” kusho uMolefe.
Kunezinsolo zokuthi uGama wathola iziqu zakhe zeMBA ngokusizwa ngusomabhizinisi osebenzisana neTransnet.
“Ukusoleka kwezikhulu yikona okwenza sibone kungcono ukuthi zimiswe. Asifuni ukuthi kuphazamiseke uphenyo, yingakho sifuna zime kancane emsebenzini. Sibeke umnqamulajuqu wokuthi kungashoni ilanga langoMsombuluko zingabhalelanga ibhodi izincwadi zokuthi kungani kungafanele zimiswe emsebenzini,” kusho uMolefe.