Balinde impendulo ngolwemenenja
SEBELINDE impendulo ye-ANC KwaZulu-Natal abasebenzi bakaMasipala waseRichmond abangayifuni imenenja yomkhandlu uNkk Bongiwe Mnikathi.
Abasebenzi bathi bayaqhubeka nokusebenza uma engekho uNkk Mnikathi kodwa uma efika baphambana naye ngoba abafuni ukusebenza ngaphansi kwakhe.
Kuthiwa akezi emsebenzini usebenzisa ama-email ukwenza umsebenzi njengoba abasebenzi bebeka phansi amathuluzi uma eke wafika emsebenzini.
UNobhala weSamwu eRichmond, uNksz Simbongile Mbalekwa, uthe ikomiti elibheka ukusebenza kwansuku zonke le-ANC esifundazweni linxuse ukuthi linikwe isikhathi ukuze lisebenze lolu daba.
Uthe licele ukunikwa kuze kube wuLwesithathu oluzayo lapho lizobuya nezimpendulo.
“Silinde i-ANC ukuthi ibuye nezimpendulo ngoba asifuni ukusebenza ngaphansi kwakhe. Baningi abasebenzi abaphethwe wukhwantalala ngenxa yakhe,” kusho uNksz Mbalekwa.
Okhulumela i-ANC esifundazweni uNkk Nomagugu Simelane-Zulu, utshele Isolezwe ukuthi bayalusebenza udaba lomkhandlu.
Imizamo yokuthola uNkk Mnikathi ukuba aphawule izolo ayiphumelelanga, ucingo lwakhe belukhala lungabanjwa.
Isolezwe ngeledlule libike ukuthi abasebenzi bahudula izinyawo njengoba bengamfuni uNkk Mnikathi.
UNkk Mnikathi wathi uyaqhubeka nokusebenza wabalula nokuthi idlanzana labasebenzi elibeke amathuluzi phansi.
Wathi ukholwa wukuthi kukhona umuntu obasebenzisayo ngoba laba basebenzi ababiki ngisho kuyena wakhala ngokuthi kudlalwa ipolitiki eRichmond.
Kwenzeka lokhu nje ngoLwesithathu amasosha oMkhonto weSizwe amise ukusebenza komkhandlu ekhala ngokungazitholi izindlu, imisebenzi kanjalo namathenda.
Akhale ngokuthi ahlale ezihambisa izikhalo zawo kodwa kungenzeki lutho yingakho emise ukusebenza.
Okhulumela umkhandlu uMnuz Sibonelo Bhengu, uthe uNkk Mnikathi uzamile ukuza izolo abasebenzi basikaza ukubeka amathuluzi wahamba baqhubeka nokusebenza.
Uthe cishe sekuphela isonto engekho ngoba abasebenzi babeka phansi yonke into uma eke wafika.