Bafuna umasipala ubaqashe ngokugcwele
ABASASEBENZI abangaqashiwe ngokugcwele kuMasipala waseMpofana, eMooi River, baphazamise ukusebenza befuna ukuqashwa ngokugcwele.
Izolo bagodle amandla besizwa ngozakwabo abaqashwe ngokugcwele okuholele ekutheni kungasetshenzwa.
Abasebenzi, abangathandanga ukudalulwa, bathe uMnuz Martin Sithole, olawula umasipala, wathembisa ngoJanuwari ukuthi abasebenzi abangaqashiwe ngokugcwele bazoqashwa.
Bathe uSithole akazange asigcine isithembiso kuze kube manje. Phambilini kukhishwe imisebenzi ewu-50 yama-general worker base befaka izicelo kodwa kwasha ihhovisi lakwandabazabantu zingakacutshungulwa izicelo.
Ngeledlule kuphume imisebenzi ewu-13 yawo ama-general worker kodwa akushiwo lutho ngayo.
“Okusiphatha kabi wukuthi sibona unyaka sewuyophela kodwa ayisakhulunywa indaba yethu. Uma sibuza uthi kusazoyiwa kwiBargaining Council, kuyoboniswana,” kusho umthombo.
Amalungu omphakathi avale amasango kamasipala ngoLwesibili nangoLwesithathu ethi awusayifuni imeya yomkhandlu, uMnuz Xolani Duma, eyisola ngokuqasha abangani. Lokhu abukushiso wukuthi kunomyalezo okuthiwa uthunyelwe ngothile ebonga umsebenzi lungakafiki usuku oluwunqamulajuqu lokufakwa kwezicelo obusatshalaliswe ezinkundleni zokuxhumana.
UMnuz Musawakhe Mayisela, okhulumela uMnyango wezokuBusa ngokuBambisana KwaZuluNatal, uthe ngeke angene kakhulu esithembisweni abasebenzi abathi senziwa nguSithole kodwa okumele bakwazi wukuthi omasipala balawulwa yimithetho. Abakwazi ukuvele baqashe abantu ngaphandle kokuthi kulandelwe leyo mithetho.
“Ukuzwakalisa ukungeneliseki ngokumasha noma ukubhikisha kuvumelekile kodwa kumele kube semthethweni futhi kungabi nodlame. Akwamukelekile ukuthi ukukhala kwabasebenzi kuphazamise umphakathi ofuna ukusebenzisa amahhovisi kamasipala,” kusho uMayisela.