Isigcawu sokucobelelana ngolwazi seSolezwe neBhange loMbuso
UMA ufuna ukwazi ukuthi ishonaphi imali yamabhanoyi aphahlazekayo yenza isiqiniseko sokuthi asikuphuthi isigcawu sokucobelelana ngolwazi lwemali esihlelwa Isolezwe ngokubambisana neBhange loMbuso, iSouth African Reserve Bank (SARB).
Isithangami sokucobelelana ngolwazi lwemali sizoba ngoMgqibelo ozayo, Agasti 25, ePlayhouse, eThekwini.
Kulindelwe izazi zezimali ezivela eSARB, oMnuz Unathi Kamlana, oyiNhloko yezemithetho, noMnuz Logan Balakrishna, oyiNhloko yePrudential Authority, okuyisikhungo seSARB esiqaphe ngeso lokhozi amabhange, imishwalense nabo bonke abasebenza ngemali ukuthi bavikela abathengi.
Abazohambela isigcawu sokucobelelana ngezimali bazothola ukuchazeleka ngeBhange loMbuso, bachazelwe ngePrudential Authority nokuthi yenzani.
Ezinye izihloko ezizodingidwa ngezokuthi umuntu ongabhalisile njengebhange uvumelekile yini ukwamukela amadiphozithi njengoba kwenza ibhange.
Abantu bazofundiswa ngomehluko phakathi kwamabhanoyi abizwa ngeponzi nepyramid scheme.
Umbuzo ohlale ubuzwa ngabantu abasuke becwilelwe yimali yabo emabhanoyini uzophenduleka ngaphansi kwesihloko esithi: “Ngabe kwenzekani uma iBhange loMbuso selingenelele ebhanoyini?”
Bazohlonyiswa ngamakhono okubona amabhanoyi ukuze bangalokothi bangene kuwo.
Uhlelo luzophathwa ngumsakazi woKhozi FM, uNongcebo McKenzie. Ukungena esigcawini sokucobelelana ngolwazi kumahhala kodwa abantu kufanele babekise indawo ngokushayela u-031 308 2663 phakathi kuka-9 ekuseni kuya ku-3 ntambama, ngoMsombuluko kuya kuLwesihlanu.