Osinde becwila nesikebhe uyachaza
KWENZEKE okungajwayelekile kodwa ngosuku okugumbukuqela ngalo isikebhe kwashona abasebenzi ababili baKwaSharks Board, ababili balimala, oyedwa osadukile.
Lokhu kushiwo uMnuz Eric Buthelezi osinde ngesikhathi yena nozakwabo bembozwa ngamagagasi olwandle eRichards Bay ngoLwesithathu olwedlule.
Kulesi sehlakalo kushone umshayeli wesikebhe uMnuz Richard Gumede noMnuz Mandlakayise Gumede, kwalimala uButhelezi noMnuz Siqiniseko Ngobese. Isidumbu sikaMnuz Siyabonga Gabela, asikatholakali.
Uthe bathi beqala ukungena olwandle uGumede (Richard) wenza okungajwayelekile ngesikhathi beyohlola ukuthi amanethi asesimeni yini, waqala ngasenyakatho balibhekisa eningizimu kanti bajwayele ukuqala ngaseningizimu.
“Ulwandle lwalunhlakanhlaka, uGumede wathi ngeke siwashintshe sizobheka ukuthi ami ngendlela yini. Sithe sesidlulile kule nethi esijwayele ukungena kuyo kodwa esingangenanga kuyo, sesiyophuma waqalaza emuva, wamisa isikebhe, wathi kimi uyayishintsha, ngamphendula ngathi kodwa umoya mkhulu ngeke usasivumela. Akazange aphendule ngoba ngangilindele ukuthi angiphendule, wasijikisa waphindela emuva, safike sayiqaqa inethi. Sithe siphakathi nayo umoya wadlanga kakhulu, isikebhe sahamba sangaqonda. UGabela wathi ngeke sisafika ekugcineni. UGumede wathi asiyisike. Asibange sisakwazi ukuthatha ummese, lashaya igagasi lokuqala nelesibili adlula, elesithathu lasithela phansi abanye bambozwa yinethi, kodwa savuka sabhukuda sabonana sonke. Kwashaya elinye, sahlakazeka sangabe sisabonana. Ngagcina ngokubona uNgobese esasibambelele naye enjinini yesikebhe esase sibheke phansi,” kusho yena.
UButhelezi ubekhuluma nezintatheli ngemuva kwenkonzo yesikhumbuzo yozakwabo abashonile, eThekwini, izolo.
Usihlalo webhodi lakwaSharks Board uMnuz Sipho Mkhize uthe ukwenzeka kwalesi sigameko kuveze isidingo sokuthi kusheshiswe uphenyo ngobuchwepheshe obungasiza ekutheni oshaka bangasondeli ngasosebeni obusahlolwa. Uthe lolu hlelo luzokwenza ukuthi babe bancane abasebenzi babo okuzodingeka ukuthi bangene olwandle njengoba kwenzeka manje.
“Sizokwenza isiqiniseko sokuthi sibheka wonke amakhona size sisithole isidumbu sikaGabela esingakatholakali,” kusho yena.
UNgqongqoshe wezokuThutha nokuPhepha KwaZulu-Natal, uMnuz Mxolisi Kaunda obemele uNgqongqoshe wezoMnotho, ezokuVakasha nezeMvelo uMnuz Sihle Zikalala ophesheya uthe: “Nginesiqiniseko sokuthi abashonile bebezazi ukuthi banekhono elingandile lokuvikela abanye abantu ebungozini, ngokubahlenga besebenza olwandle olushintshashintshayo. Kwabebesebenza nabo sithi bangadikibali, baqhubeke nomsebenzi abawenzayo. Abahambile bahambe njengamaqhawe, ayohlale ekhunjulwa ngokuzinikela kwawo,” kusho yena.
UNksz Thandi Gumede udadewabo kamufi (Richard) ubonge iSharks Board ngokubeseka.
Umfowabo kaGumede (kaMandlekayise), uMnuz Siyabonga uthe imikhuleko nokwesekwa akutholayo kubabopha amanxeba.