Izicelo zamaphemithi kazibuyi: abamatekisi
OSOMATEKISI bakhala ngokugqoza kokukhishwa kwamaphemithi okusebenza abathi abanye babo bafaka izicelo zawo ngo-Ephreli kodwa kuze kube manje abakaze bawathole.
UMnuz Bhekisisa Nzuza, okhulumela iNational Taxi Alliance KwaZulu-Natal, uthe iProvincial Regulatory Entity Board (PRE-Board), idlala ngabo ngoba yavula iwindi lokuthi kufakwe izicelo zamaphemithi kodwa awabuyi.
“Sahambisa yonke imininingwane eyayidingeka kodwa amaphemithi amatekisi awaphumi. Okusiphatha kabi wukuthi izimoto ziyaboshwa, uShanela awuyingeni indaba yokuthi sisalinde amaphemithi. Siyacela iPRE isinike amaphemithi ethu.”
UMnuz Bafana Mhlongo, uNobhala weSouth African Taxi & Transport Alliance, uthe ngoLwesibili iPRE ibihlangene nosomatekisi besifunda iGreater North okukhona kubo iNanda, KwaMashu nezinye izindawo ukuchaza ngezinhlelo zayo.
“Sixakekile uma sesimenywa emhlanganweni ekubeni iPRE ingazikhiphi izimvume zethu zokusebenza. Eziphumayo ziyagqoza. Kuthiwa ezinye ziyadayiswa ngoR20 000. Akekho osichazelayo ukuthi izicelo zihamba kanjani. Asihambisani nale mihlangano ngoba ayizi nezixazululo ezinkingeni zemboni yamatekisi. Sinenkinga yamaphemithi, eyokungabikho koxhaso lwabagibeli nokubulawa kwabanikazi bomsebeni. Zonke lezi zinto zidinga ukuxazululwa,” kusho uMhlongo.
UMnuz Mluleki Mntungwa obhekelele ezokuXhumana eMnyangweni wezokuThutha nokuPhepha koMphakathi KwaZulu-Natal, uthe iPRE iqale ukuvakashela izifunda ezehlukene zamatekisi ngoJulayi ukuze ixoxe nabasembonini.
Uthe kuyenzeka kuthathe isikhathi eside ukukhishwa kwezimvume zokusebenza kodwa lokhu kuya ngokuthi umnikazi wetekisi uyithumele yonke yini imininingwane edingekayo.
“Kuningi okulandelwayo ngaphambi kokuthi kukhishwe imvume yokusebenza, njengokuthi kufanele umnikazi wetekisi alethe wonke amaphepha adingwa yiPRE, kufanele sithole ukuphawula kumasipala okusebenza kuwo itekisi, kufanele sithole isitifiketi sentela somnikazi wetekesi. Ngenxa yobuningi bezicelo zezimvume ezitholwe yiPRE kuvulwe amahhovisi azokhipha izimvume ePort Shepstone, Mbazwana, Ladysmith naseMpangeni. Lokhu kuzosiza abanikazi bamatekisi ukuthi bafake izicelo eduze kwalapho besebenzela khona bangayi eMgungundlovu bonke.”
Uthe kunezinhlelo zokuvula ihhovisi lePRE eThekwini maduzane.
UMntungwa uthe izimvume zokusebenza zinikwa abanikazi bamatekisi hhayi ososeshini babo ngoba kufanele bagcwalise amafomu okucela imvume, kucutshungulwe isicelo sabo, isicelo sibe sesishicilelwa kwiGovernment Gazette okuwuhlelo oluthatha izinsuku eziwu-21.
Emuva kwalokhu kuhlalwa phansi kulalelwe isicelo somuntu ofuna imvume yokusebenza. Ithimba elilalela isicelo libe selinquma ukuthi isicelo siyaphumelela noma siyachithwa bese kukhishwa imvume yokusebenza uma isicelo siphumelele.
Ugqugquzele osomatekisi abanobufakazi bokuthi amaphemithi ayadayiswa ukuba bathinte uMqondisi Jikelele wePRE, uMnuz SJ Langa, noma uMqondisi, uNkk N Majola, noma uMnuz S Ntuli ku-033 341 9500.
Uthe bangathinta nehhovisi likaNgqongqoshe wezokuThutha ku-031 360 6576 noma ku-033 355 8760 nasemaphoyiseni.
“Akudingeki ukuthi abantu bazidalule amagama abo kodwa bangacela ukufihlwa uma bevula icala emaphoyiseni noma bebika ehhovisi likaNdunankulu waKwaZulu-Natal nelikaNgqongqoshe wezokuThutha.”
Kulabo abathi amaphemithi ayadayiswa benganabo ubufakazi uthe kuyicala ukusola abantu ngenkohlakalo ungenabo ubufakazi.