Abafundi bayalwe ngokonga imali
INKOSIKAZI kaNdunankulu waKwaZulu-Natal, uNkk Zodwa Mchunu, idonse ngendlebe abafundi baseWeenen Combined Primary, ukuthi bafunde ukonga imali ukuze kuthuthuke umnotho waseNingizimu Afrika.
UNkk Mchunu, izolo ubehambele eWeenen Combined Primary ngenhloso yokukhuza umkhuba omubi wokuhlukunyezwa kwabesifazane nezingane nokugqugquzela umphakathi ukuthi wonge imali.
Utshele abafundi ukuthi akudingeki ukuthi umuntu abe nezigidi ngaphambi kokulondoloza imali kodwa kufanele aqale ngaleyo encane anayo ukuze akwazi ukuphila kahle. “Alikho izwe emhlabeni elake lathuthuka kodwa abantu bakulelo zwe bengabantu abangakwazi ukonga imali. Thina lapha eNingizimu Afrika siyayidlake imali. Iningi lethu aliyibeki imali. Uma singafunda ukuyibeka imali, singathuthukisa impilo yomndeni. Masiyeke ukujaha amaswidi nama-chips, ukuthenga amateku nojini kuze kuphele inyanga kungasekho lutho ebhange,” kusho uNkk Mchunu.
Uthe abafundi kufanele bonge imali ukuze kuthi kusasa uma befuna ukuqala ibhizinisi, noma ukuthenga imoto yokuthutha abantu noma impahla, bakwazi ukukhipha emgodleni.
Utshele abafundi ukuthi babukele kumdlali webhola osengumqeqeshi weCape Town City uBenni McCarthy owaqala ukudlala ibhola phesheya eseneminyaka engu-17.
“UBenni uzalwa endaweni yaseCape Town ekhungethwe ubuphofu kodwa ngebhola nje wakwazi ukufukula umndeni wakhe. Namuhla ungumqeqeshi owaziwayo yize esemncane.
“Baningi abadlali eningabheka kubo. Umdlali weSundowns uPercy Tau uneminyaka engu24, namuhla udlala Europe. UCaster Semenya, ungumgijimi waseLimpopo ophethe amarekhodi omhlaba. Naye uzalwe endaweni enobuphofu, kodwa akavumelanga isimo sezomnotho ukuba sithikameze iphupho lakhe.”
NgoLwesithathu, uNkk Mchunu ubeseMhlangano Primary eMsinga nakhona wagqugquzela abafundi ukuthi bazihloniphe ukuze bakwazi ukuhlonipha nabanye abantu futhi bonge imali. IKHASI ELIKHOKHELWE