Usamangele ozibonele kudutshulwa umngani
UBULAWELWE ukubuza ukuthi badatshulelwani phakathi benomngani wakhe abehamba naye umlisa wasehostela laseMlaza iGlebelands okuthiwa udutshulwe abantu abangaziwa ebuya kovakasha eLamontville.
Umngani kaMnuz Zoliswa Nyathi obehlala eBlock Z, eGlebelands uthe namanje usamangele ukuthi usinde kanjani ngesikhathi behlaselwa amadoda angaziwa nomngani wakhe ngoMgqibelo ebusuku.
UNyathi oshonele esibhedlela ngoMsombuluko, benomngani wakhe kuthiwa bebebuya komunye umngani wabo eLamontville behamba ngasegaraji lakwaShell kuSouth Coast Road ngesikhathi kuqhamuka abalisa bebadabula phakathi ngezithuba zabo-8 ebusuku ngoMgibelo.
“Besihamba sizixoxela singalindele ukuthi singahlangabezana nalesi simo. Laba bantu bebebane noma bebahlanu. Baqhamuke emuva kwethu basidabula phakathi abanye basikaka ngapha nangapha. Umngani wami ubabuze ukuthi kodwa bakwenzelani lokhu. Abamphendulanga, kuvele kwaphendula oyedwa ngenhlamvu wamdubula esiswini base beyahamba,” kusho lo mlisa.
Uthe laba balisa abazange basho lutho emuva kokudubula umngani wakhe, bavele bahamba babaleka bayongena emijondolo engasegaraji. Uthe namanje usamangele ngoba abazange bamkhombe ngasibhamu yena emuva kokuthi sebedubule umngani wakhe.
“Ngashaqeka ngesikhathi bemdubula ngasala ngimbambe ngesandla ngase ngagijima ngayobheka abantu abangasiza ngemoto khona eLamonti la esasikhona. Sibe sesimthatha samphuthumisa esibhedlela eWentworth wafakwa ukhonkolo ngoba kutholakale ukuthi uphuke nonyawo wase edluliselwa eKing Edward nalapho abafike bamhlinza khona waphetha ngokushona ngoMsombuluko,” kusho umngani wakhe.
Uthe lesi sigameko simphathe kabi njengoba besuka bonke ndawonye e-Eastern Cape noNyathi futhi sebebe abangani isikhathi eside.
Uphinde wathi akakholwa ukuthi lesi sigameko sihlobene nokubulawa kwabantu basehostela. Uthe ukholwa ukuthi laba balisa bebenochuku nokuthi bebengabalandeli.
Okhulumela amaphoyisa KwaZulu-Natal, uCaptain Nqobile Gwala ukuqinisekisile ukuthi baphenya icala lokubulala emuva kokuhlaselwa kukaNyathi.
Uthe asikaziwa isizathu sokubulawa kwakhe okwamanje. Akukaboshwa muntu.