Akasekho umculi we-soul u-Aretha Franklin
KUGCINE kuyenele ingwazi yomculo we-soul yaseMelika, u-Aretha Franklin (76), okushone elayizolo sekuqinisekisiwe ukuthi ishonile.
Lo mculi ushona nje bekuvele sekubanjwe umoya ngesimo sempilo yakhe njengoba imibiko yabezindaba ike yakuveza kuleli sonto ukuthi kubi kulo mculi.
Kuthiwa abevele esemancane amathemba okuthi lo mculi uzoba ngcono ngendlela abebambeke ngayo.
Isitatimende somndeni wakhe sikuqinisekisile izolo ukuthi akasekho emhlabeni. Kuthiwa ushone ngo-9:50 ekuseni izolo ekhaya eDetroit. Ngesikhathi eshona kuthiwa ubenomndeni wakhe ngokusho komkhulumelayo uGwendolyn Quinn.
Kuthiwa ubephethwe wumdlavuza wamanyikwe, umgudu wawo kanye nezitho zomzimba ezibucayi eziseduze kwawo nokubalwa kuzona ububende.
Lesi sifo esimthathile siqinisekiswe wudokotela wakhe uDkt Philip Phillips weKarmanos Cancer Institute in Detroit.
Ukushaya umculo osezingeni eliphezulu kwenza wagcina esebizwa ngeQueen of Soul.
Isitatimende somndeni kaFranklin sithe, “Kulo mzuzu onzima siphelelwa ngamagama okuchaza ubuhlungu esibuzwayo ngokushona kwakhe. Silahlekelwe singumndeni. Uthando abenalo ngezingane zakhe, abashana, abazukulu nabakwabo belungenamkhawulo.”
Siphinde saveza ukuthi bayijabulele indlela abasekwe ngayo abangani, izihlobo nabalandeli bomculo wakhe ngemikhuleko yabo. Siqhuba sithi uthando olukhonjiswe abantu ngoAretha luveza ngokusobala ukuthi umlando wakhe ngeke uphele. Siphethe ngokuthi umndeni ucela ukunikwa ithuba kulesi sikhathi sokuzila. Amalungiselelo omngcwabo wakhe kuvele ukuthi azomenyezelwa ngokuhamba kwesikhathi.
U-Aretha kuthiwa bese kuneminyaka ebambekile kodwa ubengawuvezeli umphakathi ngokungaphili kwakhe.
Ngo-2017, u-Aretha umemezele ukuthi uzoke ame ukuba nemijikelezo yokuyonandisa ezindaweni ezahlukene ngenxa yesimo sempilo yakhe kodwa wathi uzoya konandisa uma eqashiwe kuphela. Ngasekuqaleni kwalo nyaka uchithe imicimbi eminingi abeqashwe kuyona ngenxa yalesi simo abebhekene naso.