Bafuna isibhicongo saseMarikana senziwe iholidi
UMENGAMELI we-Association of Mineworkers and Construction Union (AMCU), uMnuz Joseph Mathunjwa uthe bafuna u-Agasti 16 kube yiholidi okuzokhunjulwa ngalo umzabalazo wabavukuzi abangu-34 ababulawa eMarikana.
“Sifuna uhulumeni enze u-Agasti 16 kube yiholidi eNingizimu Afrika. Sifuna ukhunjulwe njalo umzabalazo wabavukuzi abangu-34 abafa bebulawelwa ukufuna impilo engcono. Babefuna ukuhola uR12 500 ngenyanga kodwa babulawa. Wusuku okufanele siluhloniphe sonke singabasebenzi,” kusho uMathunjwa.
Uthe ukubulawa kwabavukuzi abangu-34 eMarikana, kuyohlale kuyinxeba elingapholi kubona.
“Sifuna bonke ababulala abavukuzi bavalelwe ejele, kuyishwa ukuthi yize sekuphele iminyaka eyisithupha kodwa abasebenzi basakhala ngeholo elingcono. Izimayini zihlela ukudiliza, kubi. Uma u-Agasti 16 wenziwa iholidi zonke izinhlaka ezithintekayo zizofuna impilo engcono kubasebenzi,” kusho uMathunjwa.
Uphinde wagxeka amaphoyisa ngokudubula abavukuzi ababengahlomile esho nokuthi lokhu kwakuyisihluku angakaze asibone.
Khonamanjalo, kunabafelokazi abawu-10 abashonelwa ngabayeni ngaphambi kwesibhicongo sokubulawa kwabavukuzi eMarikana. UNkk Aisha Fundi uthe uMengameli Cyril Ramaphosa kufanele aye eMarikana azokhuluma nabo ngodaba lwesinxephezelo.
“Abayeni bethu babulawa ngaphambi kokuthi kudutshulwe abavukuzi abangu-34, akekho okhuluma indaba yokunxeshezelwa kwethu. Asazi noma yiLonmin noma nguMengameli ofanele asinxephezele,” kusho uNkk Fundi.
Uthe umyeni wakhe uMnuz Hassan Fundi wayengunogada eLonmin. Yena nozakwabo uMnuz Frans Mabalane babulawa ngabavukuzi ababetelekile. Bahlahlelwa ngembazo bashiswa nemoto yabo.
“Abavukuzi ababetelekile babahlahlela base bebavalela emotweni yabo yomsebenzi bayishisa. Sathola abayeni bethu beyizicucu, singazi nokuthi yiziphi izicubu zomzimba ezilahlekile. Satshelwa ukuthi izicubu zabo ziyiswe ezangomeni,” kusho uNkk Fundi.
ILonmin ibinenkonzo yokukhumbula abasebenzi bayo abangu-44 ababulawa ngesihluku ngo-Agasti ka-2012.