UCele ufuna ukuphikisana nombiko kaMkhwebane
UNGQONGQOSHE wamaphoyisa uMnuz Bheki Cele uthe ufuna ukuphikisana nombiko woMvikeli woMphakathi u-Advocate Busisiwe Mkhwebane wokuthi kumele banikwe abavikeli ababhoboza ithumba ngenkohlakalo yokwakhiwa kwehholo laseMzimkhulu okwagcina ngokuthi kubulawe owayeyikhansela kulo mkhandlu uMnuz Sindiso Magaqa.
Okhulumela uCele, uNksz Reneilwe Serero, uthe bawutholile umbiko ongakakhishelwa umphakathi.
Kulo mbiko onamakhasi angu-47 u-Advocate Mkhwebane uthole ukuthi ukufeyila kukaCele namaphoyisa ukuhlinzeka ngabaqaphi uMnuz Thabiso Zulu noMnuz Les Stuta kubabeke engozini yokuthi basocongwe.
Kulo mbiko uthe kumele uCele ahlinzeke uZulu noStuta ngabaqaphi abazokhokhelwa wumbuso.
UZulu noStuta batshela abazili emngcwabeni kaMagaqa ngoSepthemba nyakenye ukuthi wabulawelwa ukuveza inkohlakalo ngokwakhiwa kwehholo iMemorial, eMzimkhulu.
Selokhu baveza lokhu babhekene nokusatshiswa, baya emaphoyiseni bayiswa le nale ngodaba lokuvikelwa kwabo baze baya ku-Advocate Mkhwebane.
U-Advocate Mkhwebane uveze ukuthi kwahlolwa ukuthi ngabe laba bayakudinga ukuvikelwa ngo-Ephreli nonyaka kwatholakala ukuthi bakudinga ngokushesha.
UNksz Serero uthe uCele uyalele amaphoyisa ukuthi awubheke lo mbiko ukuze bawuphikise.
UZulu uthe benoStuta bakhathazekile ngokuthi basengozini.
“Amaphoyisa kumele alandele isinqumo soMvikeli woMphakathi ngaphandle uma sibekwe eceleni yinkantolo. UCele ungumholi wami, ngiyamhlonipha angifuni kubukeke sengathi lento iphakathi kwami naye. Ngaphambi kokuba abe nguNgqongqoshe ngingomunye wabantu ababefuna ukuthi abuyele kulesi sikhundla ngoba ngiwazi amagalelo akhe ekulweni nobugebengu,” kusho uZulu.