Asibuyiswe isithunzi selozokushushiswa komphakathi
KULELI sonto iNkantolo yoMthethosisekelo inqume ukuthi ukuqokwa kuka-Advocate Shaun Abrahams njengoMqondisi wophiko lokushushiswa komphakathi kwakungekho emthethweni futhi ukuxoshwa kukaMnuz Mxolisi Nxasana kwakungafanele.
Amajaji ale nkantolo anqume nokuthi uNxasana kumele abuyise uR10.3 million akhokhelwa wona ngesikhathi exoshwa kodwa akuchithile ukuthi kube nguye obuyiselwa kulesi sikhundla.
Aphinde agcizelela nokuthi izinqumo ezithathwe ngu-Abrahams njengomqondisi wabashushisi azithinteki.
Abe esenqumela uMengameli Cyril Ramaphosa ukuthi aqoke umshushisi omkhulu omusha zingakapheli izinyanga ezintathu. URamaphosa usebeke uDkt Silas Ramaite owuqweqwe lommeli ukuthi abambe kulesi sikhundla.
Lesi sinqumo seNkantolo yoMthethosisekelo siyigxathu lokuqala lokubuyisa isithunzi kulolu phiko osekuneminyaka seliphenduke ibhola lokuthi osopolitiki balwe ngalo izimpi zabo nezimbangi zabo.
Ukuqokwa kuka-Adv Abrahams okube nezinqumo ezishayise amakhala ngesikhathi ephethe, kwenzeke zivele izinto zimapeketwane kulolu phiko obekungaselula ukuthemba ukuthi izinqumo ezenziwa kulo zisemthethweni noma zenziwa ngoba kudanselwa isigingci sosopolitiki.
Isinqumo seNkantolo yoMthethosisekelo sesiphinde saqubula inkulumo-mpikiswano yokuthi akumele yini umengameli aphucwe amandla okuqoka umqondisi wezokushushiswa komphakathi ngoba la mandla yiwona avula intuba yokuthi osopolitiki benze umathanda ngaleli hhovisi.
Inkulumo-mpikiswano edinga ukuthi iqhutshwe lena futhi mhlawumbe kufanele ihlale ezithebeni zePhalamende.
Nanoma ngabe yini ezokwenzeka kusukela manje, leli yithuba lokuthi kulungiswe izinto kulolu phiko, sithemba ukuthi uma esegcina eqokiwe umqondisi wezokushushiswa komphakathi omusha, ngeke uRamaphosa ahlehlisele emuva umsebenzi weNkantolo yoMthethosisekelo.
Ihhovisi lomqondisi wokushushiswa komphakathi lingelinye lamahhovisi abalulekile ezweni elibuswa ngentando yabantu, asibuyiswe isithunzi salo.