Sebewenzile umsebenzi abaholi kwezemfundo
MHLELI: Kuthi angigiye ngiqephuze uma ngibona abaholi bekhathalele imfundo kangaka njengawo uMnyango wezeMfundo. Odabeni oluphume emasontweni adlule lapho uMnyango wezeMfundo KwaZulu-Natal ubambisene noMnyango weMfundo oyiSisekelo ikhiphe uhlelo olusha olubizwa ngeSecond Chance Matric oluzovumela abafundi abangakwazanga ukuphumelela ku-matric eminyakeni edlule.
Bazonikwa ithuba lokuphinda izifundo abangaphumelelanga kuzo eminyakeni edlule. Lolu hlelo luzohlanganisa bonke abafundi abanezifundo zika-matric ezingaphelele abafisa ukuzigcwalisela ukuze bathole izitifiketi zika-matric njengoba kushiwo esikhangisweni.
Lolu hlelo luwumqondo omuhle njengoba sonke sazi ukuthi u-matric uwumgogodla wekusasa lakho.
Lolu hlelo oluqhamuka emnyangweni wezemfundo ngilubona luluhle kakhulu ukuthi bakwazi ukuvumela abafundi baphinde bathole ithuba lokubhalela u-matric ngoba lokhu kuzokwenza ukuthi babe sethubeni lokwenza ikusasa labo liqhakaze.
Kuyathokozisa ukubona ukuthi umnyango awugxilile kuphela kulabo bafundi abenza kahle kodwa uyakhathazeka nangalaba abangenzi kahle. Lokhu okwenziwe wumnyango siyakubonga futhi siyakukhuthaza ukuthi bakwazi ukubeka abafundi bakulesi fundazwe phambili.
Ubuholi obuqotho njengalobu siyabudinga ezweni lonke. Sengathi nabo abafundi bangaba nogqozi lokubhalisela lolu hlelo ngoba yilona oluzobasiza ekutheni bathole ithuba lokuya emanyuvesi baphinde bavuleleke namathuba emisebenzi.
Sekuyosala kubona abafundi ngoba konke sekusezandleni zabo, konke sekwenziwe ukuseka bona. Carol Fundile Ngcobo