Injabulo ngendondo ethathwe yiTheku
IMEYA yeTheku, uNkk Zandile Gumede, ithe ijabule ngokunqoba kweTheku indondo yokuba ngumasipala onakekela imvelo, iGreenest Municipality emcimbini obungoLwesibili.
Le ndodo iTheku liyiklonyeliswe nguMnyango wezeMvelo kuzwelonke emuva kokuhlola bonke omasipala ukuthi bahlanzekile nokuthi bayayinakekela yini imvelo, lagixabezwa nangesheke likaR3.5 million.
“Ngijabule kakhulu ukwamukela le ndondo kaMasipala weTheku, kuthatha abaholi abakhathalele ikusasa ukuqaphela ezemvelo. Siyabonga ukuthi imizamo yethu yokunakekela imvelo nokuqinisekisa ukuthi iTheku lihlanzekile ithela izithelo ezinhle. Imvelo inakekelwa yithimba eliyithandayo eliza nezinhlelo ezenza umphakathi ukubone kubalulekile ukuthi sinake imvelo sigcine nedolobha lethu lilihle,” kusho uNkk Gumede.
Uthe bayajabula ngokuthi umklomelo uhambisana nemali ezobasiza ukuqinisekisa ukuthi iTheku lihlala liqhakazile, linemvelo enhle futhi lihlanzekile.
“Bekungelula ukuthi ziqale izinhlelo zokunakekelwa kwemvelo kodwa senza konke okusemandleni ukuthi ziyasungulwa futhi ziyasebenza. Lo mklomelo ukhombisa ngokusobala ukuthi uhlelo lwethu lokuqinisekisa ukuthi iTheku liba yidolobha okumnandi ukuhlala kulo eminyakeni ezayo luzophumelela,” kusho uNkk Gumede. NgoLwesibili, uNkk Gumede nePhini likaNgqongqoshe wezeMvelo, uNkk Barbara Thompson bebekhuculula imigwaqo yeTheku nezindawo ezigudle amabhishi. UNkk Thompson umdonse ngendlebe uNkk Gumede wathi akaqhubeke nezinhlelo zokuqinisekisa ukuthi iTheku lihlanzekile futhi linemvelo eqhakazayo.Ukhumbuze abantu ukuthi imfucuza ayigcini ngokungcolisa kodwa ilimaza imvelo nezilwanyana ezihlala olwandle ezibulawa wukuklinywa woplastiki nenye imfucuza ephelela emabhishi.