Sidinga iVAR kweyePremiership
NGIKE ngicabange ukuthi uma ngingake ngibe yisigwili ngelinye ilanga ngingavakashela elinye lamazwe aphesheya ngihlale khona noma yinyanga eyodwa nje.
Yiphupho nje lelo ngoba phela akukho okubi ngokuhlala wedwa uzicabange uyinkinsela, umacaphuna kusale. Ngiyazibona nje ngitshabaza koBerlin, eGermany, noma koParis, eFrance, ngingazi nokuthi lidumephi.
Uma selidlulile leli phupho engivamise ukucabanga ngalo ezinzulwini zobusuku, ngizibuza ukuthi ngabe ngingakwazi yini ukuhlala kude neNingizimu Afrika isikhathi eside. Ngaphandle kobubha, ukukhwabanisa, ubelelesi nezinga eliphezulu labantu abangasebenzi, leli lizwe lihle kakhulu futhi ngiyaziqhenya ngokuthi ngazalelwa eNingizimu Afrika. Okungichaza kakhulu ngabantu baseMzansi ukuthi yize zikhona izingqinamba ezweni kodwa bakushiya uncamile ngendlela abahlekisa ngayo. Nginesiqiniseko sokuthi alikho ilizwe elifana neNingizimu Afrika uma sekukhulunywa ngendlela abantu bakhona abahlekisa ngayo ezinkundleni zokuxhumana.
Ngiyazi ukuthi uma ubhayizela kuTwitter, ukhuluma ukuthanda kwakho, ubuya umayoywana ngendlela abakunabisa ngayo kodwa okungithinta kwamancane yindlela abantu baseMzansi abahlekisa ngayo ngezinto ezithile abaziphanyeka ezinkundleni zokuxhumana. Muva nje kunetemu elikhuluma ngeVAR (iVideo Assistant Referee) egqame kakhulu ngesikhathi kudlala iNdebe yoMhlaba eRussia nonyaka.
Ukubhalansisa (ngingeyena uShaka weThe Queen) labo abangazi ngeVAR, ibisiza onompempe ukuthi bathathe izinqumo eziyizo uma kukhona abangakubonanga kahle ngesikhathi kudlala ibhola eRussia. Isibonelo nje, uma unompempe engabonanga ukuthi umdlali ulithinte ngesandla yini ibhola esebhokisini ubeqale ayobheka kahle lapho kuphindwa khona ngonyawo lonwabu ngaphambi kokuthi athathe isinqumo sokuthi uyikhomba emlotheni yini. Ziningi-ke nezinye izinqumo ebezibhekwa kuyona iVAR.
Idlulile-ke iNdebe yoMhlaba kodwa yasala iVAR kubantu baseMzansi. Nokho bona babheka okuhlukile ngoba iVAR yabo ike ibheke ukuthi ilebula oyigqokile ngabe iyona yini, noma ibheke into osuke ushuthe eduze kwayo. Idumile-ke iVAR yaseMzansi kulezi zinsuku ezinkundleni zokuxhumana.
Okungenza ngiqale ngindlalele kanjena ukuthi ngibona sengathi kuzosiphinda okwangesizini edlule uma ngibheka izinqumo ezisathathwe onompempe ezingagculisi emidlalweni embalwa esadlaliwe. Ngibona sengathi iVAR idingeka kakhulu emidlalweni ye-Absa Premiership ngoba onompempe bethu sengathi basabuya nento efanayo nakule sizini.
Ukwenza isibonelo nje, zingimangazile kakhulu ezinye zezinqumo zikamsizi kanompempe ngesikhathi kubhekene iBaroka FC neKaizer Chiefs ngoLwesibili. Uma ngingaphosisi kuze kwaba izikhawu ezine umsizi kanompempe ephakamisa iduku ekhomba ukuthi kukhona umdlali oseyioffside kodwa kuthi uma sekuphindwa ngonyawo lonwabu kucace ukuthi ushaye eceleni kakhulu. Igoli elishaywe uLeonardo Castro unompempe eseliphakamisile iduku bekumele libalwe ngoba bekucace bha ukuthi ubengeyona i-offside. Naleli elibhulukelwe uKhama Billiat lagcina liphelele ezandleni zikanozinti weBaroka, belingase lisuse umsindo ukube lingenile ngoba ubengeyona i-offside njengokusho kukamsizi kanompempe.
Umbuzo enginawo owokuthi kanti abafundi yini emaphutheni abo onompempe uma benza into efanayo amasizini elandelana? Bona laba ababaphethe yiziphi izinyathelo abazithathayo ukuqinisekisa ukuthi bayathuthuka ekuphatheni imidlalo yePremiership? Iligi yethu ithathwa njengenye yamakhulu emhlabeni kodwa kubukeka sengathi imidlalo yayo iphathwa ngonompempe abangenawo amava afanele.
Njengoba ngiyintatheli nje, ngilindele ukuthola onsumbulwana abalingana nomsebenzi wami mhlaka 25, ngeke ngiqambe amanga ngithi ngiyazi ukuthi kungabiza malimi ukuba neVAR emidlalweni yePremiership. Ngizazela kona nje ukuthi ngizohola malini ngesonto elizayo. Kodwa ngibona sikhona isidingo sokuthi iPremier Soccer League (PSL) ngokubambisana neSouth African Fooofball Association (Safa) bake bayidingide indaba yonompempe neVAR babone ukuthi ngabe singakwazi yini ukuba nayo emidlalweni yethu.
Inkinga enkulu ukuthi izinqumo okungezona ezithathwa ngonompempe zisusa ukukhuluma enkundleni nangaphandle kwayo. Akukuhle nje ukuthi kube khona iqembu elilahlekelwa umdlalo kungenasidingo ngenxa yobudedengu bukanompempe.
Isizini isephansi impela kodwa sekuyaqala kuyabonakala ukuthi sengathi babuya nawo amaphutha angesizni edlule onompempe bethu.
Abantu baseMzansi bahle kakhulu ngoba bayayiqonda futhi bayayithanda iVAR, nokungenye yezinto ezizokwenza ngipheze ukucabanga ngokushiya leli lizwe, kungakhathakekile noma kungabe kuyinyanga eyodwa nje. Nokho lena edume ezinkundleni zokuxhumana yinhle ngokuhlekisa nje ngoba nakho kuyimpilo. Kodwa mina ngiyifuna ezinkundleni zikanobhutshuzwayo iVAR ukuze kungabi khona ukukhononda ngezinqumo zonompempe kule sizini ye-Absa Premiership okubhekwe lukhulu kuyona. Kungakuhle iPSL neSafa bayifakele izibuko eyeVAR.