UMicho usecula ingoma ehlukile
UGQANYELWE amabhawodi axegayo eqenjini lakhe umqeqeshi we-Orlando Pirates, uMilutin “Micho”Sredojevic, ofuna ukuthwala ingcindezi ngokuqala ngendlela engagculisi kweZimnyama.
I-Pirates ihlulwe yiBidvest Wits ngo 1-0 wegoli elibe wumkhonto ogwaze ekhaya kaGladwin Shitolo emdlalweni we-Absa Premiership e-Orlando Stadium ngoLwesithathu ebusuku. Bekungokwesibili iPirates ihluleka wukucosha amaphuzu agcwele ekhaya kusukela kuqale isizini. Emdlalweni wokuvula isizini ka-2018/2019 ibanjwe yiHighlands Park ngo 1-1. Emuva kokuqeda isizini ka-2017/2018 ngegiya eliphezulu, iningi belibheke ukuthi eZimnyama zizoqhubeka ngendlela efanayo.
Nokho izinkinga ezintsha zihlale obala eqenjini likaMicho, emasontweni edlue obekade ezishaya isifuba ngendlela abayilungiselele ngayo isizini, ethi abalandeli abalindele isitshulu esiconsisa amathe.
“Ebholeni kunezinkinga ezimbili. Eyokuqala yindlela odlala ngayo, eyesibli yimiphumela. Uma unenkinga yakho kokubili, sekuyicibhicongo. Uma unesizini osayibhekile, kujwayelekile ukuthi ungaqali kahle njengoba kwenzekile. Sibhekane nengozi yokwehlulwa kodwa kuyinto encane. Asinayo inkinga yokudlala kahle, ngikholwa wukuthi sisayiphathe yonke imidlalo esisayidlalile ngaphandle kwalona esithole kuyona ikhadi elibomvu ePort Elizabeth.
“Sicabanga ukuthi sisenze kahle. Uma wakha indlu ngeke wakhe isisekelo, unyuse izindonga bese ufaka uphahla ngesikhathi esisodwa,” kusho uSredojevic.
I-Pirates ithole amaphuzu amathathu ekuhambeni kwiChippa United emdlalweni ewuwine ngo1-0. Isashaye amagoli amabili emidlalweni emithathu. Emdlalweni neWits kuhlale obala ukuba buthuntu kwayo phambili nokwenze iningi labuza umsebenzi womqeqeshi wabagadli, uStephane Adams.
“Ngikholwa wukuthi siyashoda ngezindlela zokugqobhoza udonga, kungaba siqhamuka eceleni noma maphakathi kodwa siyakulungisa lokho. Ngabadlali esinabo nomsebenzi esiwenzayo, ngokushesha kuzolunga, sibe neqembu elingashodi ngalutho. Okwamanje kusashoda, siyayiphatha imidlalo kodwa lokho akusiletheli imiphumela.
“Silwenzile uhlelo nomqeqeshi uStephane Adams lokuthi asebenze nabadlali, abathathe ngamaqoqo ahlukene ukuze sibe ngcono ekuqedeleni amathuba ngokuhamba kwesikhathi, sivune izithelo. Siyakwazi okulindeleke kithina nengcindezi okuhambisana nayo kodwa ngikhetha ukuthi lokho kuze kimina nethimba labaqeqeshi ukuze abadlali bakhululeke,” kusho uSredojevic.
I-Pirates izovakashela iBloemfontein Celtic emdlalweni wePremiership eFree State Stadium ngeSonto ngo-3 ntambama. Umqeqeshi weCeltic, uSteve Komphela, uhlulekile ukwehlula iPirates kumasizini amathathu ekwiKaizer Chiefs. ICeltic isayiwine yomibili imidlalo yesizini entsha.
“Siyodlala endaweni enhle neqembu elizobe lifuna ukuqhubeka nokuthola imiphumela emihle. Sifuna ukuqhubeka nokudlala ngendlela esivele sidlala ngayo kodwa sifuna ukulungisa inkinga yamagoli. Uma sekuvuleke lokho sizoyithola imiphumela,” kusho uSredojevic.