IKaizer Chiefs imfuna ebuyele eNaturena uGordinho
IZINKINGA zeKaizer Chiefs zasemuva sezenze leli qembu lenza imizamo yokubuyisa uLorenzo Gordinho ebelimbolekise kwiBloemfontein Celtic, ngokushesha.
Izolo kuvele ukuthi iChiefs ithumelele iCeltic incwadi iyicela ukuthi idedele uGordinho abuyele kuyona ngokushesha.
ICeltic neChiefs bebenesivumelwano sokuthi lesi siqongqwane somdlali wasemuva sihlale izinyanga eziwu12 kwiSiwelele kusuka ngoJanuwari nonyaka.
Lesi sivumelwano besizophela ngoDisemba. Imenenja kaGordinho uMike Makaab wePro Sport International yayikubeke kwacaca kwiSolezwe phambilini ukuthi uma uGordinho engeke adlale kwiChiefs kungangcono azihlalele kwiSiwelele ngoba ijezi uyalithola khona.
“Kuyiqiniso ukuthi uLorenzo simfuna eNaturena. Empeleni uyena ozicelele ukubuya ngakho angifuni ukugxila ezizathwini zokuthi yini emenza afune ukubuya ngoba ekugcineni ungumdlali wethu. Siyitshelile iCeltic ukuthi sicela imbuyise, sesilinde yona-ke ukuthi isazise kusuka manje,” kusho uVina Maphosa ophethe ezokuxhumana kwiChiefs.
Kuke kwaba khona ukukhuluma okuthi uGordinho ngeke ahlalelane noSteve Komphela kwiCeltic kwazise nakwiChiefs wayelizwa ngendaba ijezi ngaphansi kwalo mqeqeshi.
Leli phephandaba libe selishicilela udaba lapho uMakaab ayeveze khona ukuthi iChiefs ifuna abuye uGordinho ngaphambi kokuqala kwesizini. Zibuye zashintsha izinto, uMakaab esethi umdlali wakhe uthe ujabule kwiCeltic, okwahumusheka ngokuthi uzimisele ngokusebenzisana noKomphela.
Nokho izolo izinto ziphinde zashintsha, njengoba iChiefs iveze ukuthi isimfuna ekhaya uGordinho ngokukhulu ukuphuthuma. Izinto azihambi kahle emuva kwiZimpofana njengoba sezingenelwe amagoli amahlanu emidlalweni emine. Ukugqama kwezinkinga kwiChiefs kubonakale ngesikhathi idlala ngokulingana neBaroka FC emdlalweni we-Absa Premiership ngesikhathi umkhonto ugwaza ekhaya uDaniel Cardoso eshaya igoli ngekhanda,behluleka njengodonga ukuxoxisana nonozinti u-Itumeleng Khune. Namuhla iChiefs izobhekana neMaritzburg United kowe-Absa Premiership eHarry Gwala Stadium, eMgungundlovu, ngo-8 ebusuku.