Kuyicala ukuhamba ngemoto eshunqayo
SASHO safika futhi leso simo esenza siklwebhe ngepeni phezu kwaleli phepha sithi zonke eziphila ngalo mhabulo wengxube yempande yezibabuli, mazithobe zichezukele lapho kuphephe khona.
Mazingakhohlwa ukuyeka ama-hazard ebaniza ukuze abanye abasebenzisi bomgwaqo bazibone. Nanamuhla singena kwelakho singasadle nkobe zamuntu kwelakho lodumo lokuwela umfula ugcwele siwuwela siphindelela.
Awanamhlanje ama-hazard asifica sihamba ngomgwaqo obheke eMnambithi enyakatho engasentshonalanga yesifundazwe, uma ngiqeda ukudlula eRoosboom ngikhangwe yifu lentuthu eluhlaza. Ngenxa yokuthi yisebusika ngizitshela ukuthi kusha isikhotha eceleni komgwaqo kanti qha yimoto ekhafula intuthu emsileni.
Le moto yiToyota Corolla ebizwa ngeRawnda ilandelwa yiVW Golf 7 emhlophe eduze. Ngithi ngisabuka lokho ngisondela kulezi zimoto zisho zishaye ama-hazard zibuyele eceleni zime. Uma ngiqaphelisisa leli galofu elimhlophe liphayiza amalambu aluhlaza bese kungikhanyela ukuthi kusho ukuthi elamaphoyisa omgwaqo lawa abizwa ngoShanela.
Nokho angikuveze ukuthi angizange ngime ukuze ngithole ubuqiniso bokwenzeka emva kokumisana kwalezi zimoto kodwa engikwaziyo ukuthi kuyicala elibomvu ukuhamba ngemoto eshunqayo.
Uzokhumbula ukuthi sike sagxila enjinini yemoto kulezi zinsuku ezedlule. Kuyo le nyanga sibe sesithola le ncwadi kagesi ekhelini lethu elithi hazardiso@ gmail.com efundeka kanje: “Shangase
Siyabonga kakhulu ngengosi yama-hazard iyakhulisana ngokolwazi lwezimoto.
Ngicela isaluleko, iToyota Corolla yango-2002 yami iyashunqa. Abanye bathi kumele ngilungise injini. Yona isahamba kahle yize idla amafutha kakhulu. Ewashini isihambe amakhilomitha angu320 000 kodwa angicabangi neze ukuyichitha le moto.
Ngizoyithola ephepheni impendulo noma-ke ungangiphendula ngayo incwadi kagesi.
Sibonge kakhulu, Tembe Sphephelo.”
Impendulo yama-hazard ebheke kuNgolanyama ihambisana nengxoxo emfishane esiyenze isingeniso kulesi sihloko sanamuhla. Uma imoto ishunqa intuthu eluhlaza ize ibe namachashaza amafutha emumva kwayo futhi idla amafutha kodwa amandla ingawehlisile, kuyacaca ukuthi isigugelwe amaringi amafutha.
Imvamisa iphistini linamaringi asamabhangela okhalweni lalo amathathu. Amaringi asebenza ukwakha umoya wamandla uma imoto isiduma kodwa elokugcina ezansi nalo iphistini lakhiwe amabhangela amathathu esikhaleni noma emseleni owodwa.
Lawa mabhangela esixoxa ngawo yiwonake agugayo akhathale bese ededela amafutha ukuthi adundubale okhakhayini lwephistini nokuthi uma esehlangana nomlilo bese kusha kuphume intuthu eluhlaza okuthi akube okwesibhakabhaka.
Sike sazichaza izinhlobo zezintuthu sathi emhlophe isho ukuba khona kwamanzi noma umjuluko embhobhweni wentuthu, emnyama emotweni eduma ngophethroli isho ukuthi kungena uphethroli omningi kunofanele phezu kwamaphistini.
Namhlanje sizogxila kulena eluhlaza ngoba umfundi wale ngosi usinike isithombe sokuthi imoto idla amafutha ngaleyo ndlela ifanele ukushunqa intuthu eluhlaza. Ukuguga kwama ringi kuphinde kuhuzule kuklwebhe kulimaze nomgodi wamaphistini.
Ikhandwa kanjani-ke injini esigugelwe amaringi? Leyo njini yakho Ngolanyama isidinga ukuqaqwa ihlukaniswe bese ishukushwa imigodi yamaphistini noma ibholwe kabusha uma isilimele kakhulu, bese uthenga amaphistini amasha.
Abanye onjiniya uma bethola ukuthi injini ibisike yabholwa ngakho ukuphinda bayibhole sekunganciphisa ugqinsi olufanele kuyenze izwele ukushisa ife kalula. Bangancoma ukuthi uyifake amabhodwe amasha abizwa ngama slivu bese ibamba nomgodi omusha sha. Nalapho-ke sekufanele uthenge ama phistini amasha namaringi akhona namabheringi aphansi kushafu.
Amabheringi abalulekile abizwa ngama-main lawa ahlanganisa ushafu nama khonrodi amaphistini. Kodwa uma ushafu ugcine wawukhipha kusuke sekuphoqa ukuthi namabheringi akhona lawa abizwa ngama big-ends uwathenge.
Lezi zinto uma usuziqaqile kufanele ubuyisele ezintsha. Uma usuqedile ukufaka zonke lezi zinto kufanele uhlole nesilinda hedi bese ufake izihlilingi ezintsha zokuhlanganisa injini ukuze angavuzi amafutha ugcobe no silikhoni lapho kufanele khona. Lapho-ke uzoba nenjini ezokudonsa amanye amakhilomitha abalelwa emakhulwini ngaphambi kokuthi iphinde ikufele.
Ngakho-ke wena wakoNgwanase sincoma ukuthi uyiqaqe injini uyiqale phansi uyenze kabusha ukuze upheze ukumosha imali ngamafutha futhi uphephise nemvelo uvike nokuboshwa ngoba ungalithola ithikithi lokunukubeza imvelo uma imoto isishunqa njengaleya engayibona eMnambithi.
Hhayi-ke siyethemba ukuthi umbuzo kaTembe sewusize abaningi abebenkinga efunze lena.
Sesingazivala izinjini zethu sicishe ama hazard ethu siyiphonse emgwaqweni imakwabo ilandele ezinye siqhubeke nokushayela ngokubuswa yimithetho yezokushayela ebusa lelizwe ukuze sihlangane sisaphephile nangesonto elizayo kuyo le ngosi.
Uma ufisa sixoxe ngena ekhasini lethu Igedlela lami with Sthembiso Shangase noma wenze njengoTembe ekhelini lencwadi kagesi yimi owenu hazardiso@gmail.com