Baqophe umlando embonini yakwaFord
KUBE yinjabulo yodwa kwaFord Motor Company kuleli sonto njengoba le nkampani ijabulele ukukhiqiza iFord Ranger ka-500 000 embonini yayo eSilverton Plant, ePitoli.
Imoto okuyiyona eqophe lo mlando yiWildtrak 3.2 Double Cab eshaya ngombala wekhethelo uPride Orange. Ukukhiqiza le moto kwaqala ngo-2011.
U-Ockert Berry, oyiVice President Operations kwaFord Middle East nase-Africa, uthe iFord Ranger yamanje ibe yimpumelelo enkulu kule nkampani futhi bajabule ngokuthi sebefinyelele ku-500 000.
“IFord itshale imali engaphezulu kukaR3 billion kuleli ngaphambi kokwethula iRanger ngo-2011 ukubhekana nemakethe yaseNingizimu Afrika bese ithumela emazweni angaphezulu kuka-148 e-Europe, eMiddle East nase-Afrika. Silandelise lokhu ngomunye uR3 billion ngo-2017 ukwandisa umthamo womkhiqizo ukubhekana nesidingo seRanger emhlabeni,” kusho uBerry.
Uqhube wathi lokhu kukhombisa ngokusobala iqhaza labo njengengxenye yomndeni wakwaFord wokukhiqiza njengoba beneSilverton Assembly Plant neStruandale Engine Plant ePort Elizabeth lapho bekhiqiza injini iDuratoq TDCI yeRanger.
IRanger ifika nezinto eziningi ezihlanganisa iSYNC infotainment system kanjalo nobuchwepheshe obusiza umshayeli obuhlanganisa i-Adaptive Cruise Control neLane Keeping System obutholakala ngaphandle kokwengeza imali kwiWildtrak.
Ngo-2015 iRanger ithuthukiswe kwafakwa nobuchwepheshe obuhlanganisa iSYNC3 obunenkombandlela.
Lokhu kuyenze yaba ngenye yezimoto eziyintandokazi kuleli. NgoJulayi wonyaka odlule idayise kakhulu emlandweni wayo njengoba kuthengwe angu-3 333.
Ngo-Ephreli kulo nyaka kuthunyelwe angu8 062 e-Europe, Middle East nase-Afrika. Ngalo nyaka kudayiswe angu-10 434 uma kuhlanganiswa nadayisa kuleli.
“Ekuqaleni konyaka ozayo sizokwethula eyokuqala iFord Ranger Raptor ezofika nokusha emlandweni weRanger eNingizimu Afrika nasesifundeni sonke,” kusho uBerry.