Ufuna ukuqwashisa abathenga izimoto
UMETHULI wohlelo lwezezimoto kuKhozi FM, uSibonelo Myeni, uthe ukuthenga imoto esisebenzile akumele kufane nokuthenga izinkinga zomunye umuntu.
UMyeni, ongena kwiVuka Mzansi ngo-7.45 ekuseni ngoLwesine ukusho lokhu ngemuva kokusayina isivumelwano sokusebenzisana ne-InspectaCar.
I-InspectaCar yinkampani edayisa izimoto esezisebenzile eqale ukusebenza ngo-2002.
UMyeni, wenkampani iMoto Media, uthe uzosebenzisa amava akhe kwezezimoto ukuqwashisa abathengi ukuze bagweme ukuqolwa.
“Ukuthenga imoto esebenzile kumele kube lula futhi kungabi nezinkinga. Kumele kufane nokuthenga imoto entsha lapho abantu bethola izimoto abangazethemba,” kusho uMyeni.
“Sibambisene no-InspectaCar ngoba sinenkolelo yokuthi bazimisele ngokushintsha isimo sempatho kubathengi bezimoto ezisebenzile. Lokhu kusebenzisana kwethu kuzoba nemivuzo emihle kubathengi bezimoto eNingizimu Afrika lapho bezothola izimoto ezingeke zibaphathise ngekhanda.”
Isikhulu sakwaInspectaCar, uPertunia Sibanyoni sithe: “Siqale izinhlelo ezibiza izinkulungwane lapho sishintsha indlela amagaraji ethu abukeka ngayo ezweni lonke. Ukutshala kwethu imali akugcini kuphela emalini njengoba sibhekela abasebenzi bethu ukuthi bafunde ngendlela eseqophelweni eliphezulu ukuphatha amakhasimende ethu uma ethenga izimoto emagaraji ethu. Ukusebenzisana nebhange lakwaWesBank kukhombisa ukuzimisela kwethu.”
Muva nje i-InspectaCar ibinengqungquthela eSun City kuhlangene abanini bawo wonke amagaraji. Kule ngqungquthela bekucotshelelwana ngolwazi ukuze kuzuze amakhasimende. GATE REMOTE