Othisha bavule icala lokusatshiswa
SEBEVULE icala lokusatshiswa othisha baseBongumusa Primary, Emaphephetheni, emuva kokuthola izingcingo ezibasabisayo zithi bangabuyeli esikoleni.
Kuthiwa ngoLwesihlanu othisha bathutheleke esiteshini samaphoyisa eNanda beyobika ukuthi bayasatshiswa. Lokhu kulandela ukushaywa komfundi aze akhonjwe ngesibhamu ngoba esolwa ngokweba iselula.
Umthombo osondelene nalolu daba uthe othisha bakhale ngokuthola izingcingo zithi abangabuyeli esikoleni.
“Othisha bathi bashayelwe ucingo ngumuntu obebatshela ukuthi abangabuyeli esikoleni ebasabisa ngokubabulala. Akubona kuphela othisha abathinteka ekushayweni komfundi kodwa kuthiwa usabise bonke othisha,” kusho umthombo.
NgoLwesihlanu sibike ngesigameko sokushaywa komfundi (15) okuthiwa ushaywe ngoba esolwa ngokweba iselula ngoLwesibili olwedlule. Kuthiwa umfundi uze wabizelwa abantu bangaphandle abahlobene nomunye wothisha bamshaya baze bamkhomba ngesibhamu ngoba esolwa ngokweba iselula kathisha osaqeqeshwa.
Ngokusho komthombo, kufike idlanzana labafundi ngoLwesihlanu kodwa othisha baye esiteshini samaphoyisa ekuseni bayovula icala base bebuya sebephelezelwa ngamaphoyisa emini.
Okhulumela amaphoyisa KwaZulu-Natal, uCaptain Nqobile Gwala, ukuqinisekisile ukuthi kuphenywa icala lokusabisa.
“Amaphoyisa aseNanda aphenya icala lokusabisa emuva kukuthi othisha bethole ucingo olubasabisayo. Udaba lusaphenywa kodwa bekungakaboshwa muntu,” kusho uCaptain Gwala.
NgoLwesine abazali bezingane ezifunda eBongumusa namanye amalungu omphakathi bashise amathayi ngaphakathi emagcekeni esikole ngoba befuna kuhambe uthishanhloko wesikole abathe bekungafanele avumele okwenzeke kumfundi ukuthi kwenzeke. SICELA niziqinisekise izinombolo eziwinile ezindaweni zeLotto ezisemthethweni. ISOLEZWE ngeke likuvumele ukuthathelwa izinyathelo zomthetho uma kwenzeke iphutha.