UMabuza uxwayise abahlukumezayo
IYISIZWE esinodlame, kwenzekeni ngathi?”
Umbuzo obuzwe yiPhini likaMengameli wezwe uMnuz David Mabuza ekhuluma emkhulekweni obungempelasonto eGoli lapho enxenxe khona abesilisa ukuthi bashintshe.
“Abesilisa abashintshe. Konke ukubulala okuhlale kukhulunywa ngakho kuqhamuka kwabesilisa. Kumele sakhe isizwe esinokuthula,” kusho uMabuza. Uthe abesilisa abangabaholi bezepolitiki kumele basho izinto ezifanele, benze nokufanele.
Amabandla uthe kumele anganqeni ukusho okwenziwa yi-ANC kahle nengakwenzi kahle, angathengi ubuso benhlangano.
“Ukuhlukumeza abesifazane kuthunaza ilungelo elikuMthethosisekelo nesifisa ukukwakha njengesizwe. Ngeke sibe noxolo njengoba siyisizwe esibukela phansi abesifazane siphinde sibacindezele.”
Uthe ngale nyanga kuhlonishwa abesifazane ababhekene nokuhlukunyezwa.
“Sikhumbula abesifazane abamasha balibhekisa ezindlini zoMbuso ngo-Agasti 9, 1956 befuna kukhululeke abantu ikakhulu nabesifazane. Ngo-Agasti 1, abesifazane baphume ngobuningi bamasha befuna kuliwe nesihlava sokubulawa kwabo nezingane. Kumele silishumayeze ivangeli lokuthi sekwanele,” kusho uMabuza.
Uthe baningi abesifazane abahlukunyezwayo abangaziwa, noma bengababoni kodwa bayazi bakhona.
“Kumele kuphele ukubulawa kwabesifazane, akunandawo kuleli. Abamabandla kumele basebenze nohulumeni ukulwa nalesi sihlava, kumele sonke sivume ukuthi kunenkinga.”
Uthe akumele kube yinto ejwayelekile ukuthi kubonakale abesifazane bemabokoboko ngoba kade beshawa, wathi abesifazane bayasaba.
“Abaphephile emakhaya. Abaphephile emigwaqweni, emasontweni nalapho besebenza khona. Abantu besifazane kuleli banovalo.”
Uthe kumele kufundiswe izingane zabafana ukuthi zihloniphe imizimba yabesifazane, zifundiswe ukuhlonipha onina nodadewabo.
“Yisikhathi sokuthi amadoda abhunge ewodwa. Kumele ayixoxe eyokuthi kuqedwe ukuhlukunyezwa kwabesifazane.”
UMabuza uthe umkhankaso ofuze lo wokuthi kunomkhuleko wokuthi kuphele udlame kumele udlulele nakwezinye izifundazwe kuleli.
“Umkhankaso onje kumele uye nakwezinye izifundazwe ukuze kufundiswe abesilisa ngokuthi bayeke ukuhlukumeza.”