Ungathengi imoto ungenalo ulwazi oluthe xaxa ngayo
MHLELI: Kwelakho elingashayi eceleni ngithi ake ngiphawule ngento eyinkinga enkulu ekuphileni kwethu singabantu, ngibhekise ohlangeni olumnyama ngoba le nkinga ngiye ngiyibone kithina kakhulu. Imoto iyathandeka kakhulu kabi ngaphezu kwazo zonke ezinye izinto ezithengwa ngabantu. Engiye ngikuqaphele uma umuntu ethenga imoto uyathanda ukufihla, afihlele nabantu abebezoba wusizo kuye.
Uma uthenga imoto yokuqala ungakaze ube nayo phambilini kufanele uthole ulwazi kubantu abanazo izimoto ngoba kuningi okufundayo kubo, ikakhulukazi uma uzothenga imoto esike yasebenza engeyintsha. Abadayisi bezimoto bavele bathi imoto isesimeni esihle noma ibheda. Yingakho ngithi kuyingozi ukufihlela abantu uma uzothenga imoto. Kufanele kube khona umuntu oxoxa naye onolwazi lwezimoto akululeke ngohlobo lwemoto ongaluthenga kwesinye isikhathi akuphelezele ukuze akubhekise imoto ewuhlobo olungcono.
Le nto yokuthi ufuna ukumangaza abantu bakubone usupake imoto egcekeni ayisebenzi. Le nkulumo yami isuka ekutheni ziningi izimoto ezipake emagcekeni ezathengwa ngale ndlela engikhuluma ngayo, umuntu wakhona athole imali yempesheni emsebenzini abone imoto egaraji thizeni iyinhle imfanela ngokubuka kwakhe ayithenge engenalwazi lwayo. Enye igcina ukuhamba iphuma egaraji ingaphinde ihambe. Iyokhandwa kuze kuphele imali yempesheni.
Mina umbono wami uthi uma uzothenga imoto qala ucabangisise kahle uhambe izindawo eziningi ezidayisa izimoto nomuntu ozaziyo izimoto, ungatatazeli uze ugculiseke yimoto oyithengayo.
Maningi kakhulu amaphutha asenzekile kuthengwa izimoto zigcine sezizalela izinkukhu sezivimbe emagcekeni ezinye sezivimbe indawo komakhenikha. Uma uthi uyabuza ezinye azitholakali izinsimbi zayo. Enye umnikazi wayo uswele imali yokuthenga izinsimbi zayo. Uma ungahamba emagcekeni ziningi izimoto ezimile ngalezi zinkinga. Edmund Ngcobo EHAMMARSDALE