Uthatha elinye igxathu esibhakeleni osekhiqize ompetha bomhlaba
USEYASHIYA kwesokuba ngumqeqeshi wesibhakela uColin “Nomakanjani” Nathan osematheni ngokukhiqiza ompetha bomhlaba.
UNathan, ongomunye wabaqeqeshi abahamba phambili eMzansi, umemezele ukuthi selufinyelele emaphethelweni uhambo lwakhe kwezokuqeqesha. Usevule inkampani yokuphatha abashayisibhakela iNo Doubt Management ahlose ngayo ukuqeda indlala yezimpi kwezamankomane. Emasontweni edlule uNathan kade esekhoneni likaMoruti “Babyface” Mthalane ewina ibhande le-International Boxing Federation (IBF) flyweight ehlula uMohamed Wassem wasePakistan. Ezinyangeni ezedlule uqophe umlando ewinisa uHekkie “Hexecutioner” Budler amabhande amathathu empini eyodwa okungele-World Boxing Association (WBA), IBF light flyweight neleThe Ring Magazine. Ngaphandle kwalokho, uNathan uwinise uSimphiwe “Chain Reaction” Konkco ibhande le-International Boxing Organisation (IBO) minimumweight.
“Lona wunyaka wami wokugcina njengomqeqeshi. Ngizosebenza nezimenenja, abaqeqeshi nezitebele ezehlukene sizame ukutholela amabhokisa izimpi. Ngizosebenzisa ubungani enginabo nabantu abathatha izinqumo ukuze kube nezimpi nokuthi amabhokisa akleliswe ngendlela efanele. Nginabantu engixhumene nabo e-Australia nase-America,” kusho uNathan.
UNathan uthe abashayisibhakela abaqeqeshayo yibona akhela phezu kwabo inkampani yakhe. Ngaphezu kwabo kukhona u-Azinga “Golden Boy” Fuzile wase-East London othathwa njengozoba ngumpetha womhlaba olandelayo waseMzansi. UFuzile, obengumpetha we-SA featherweight, usanda kuhlabana ngebhande le-IBF Continental Africa Super Featherweight.
“Inhloso yami enkulu wukuqala izingane zisencane kwezamankomane. U-Azinga ubekade ekleliswe endaweni ka-15, wawina ibhande lase-Afrika, wanyukela endaweni ka-13. Isifiso sami wukuthi kuphele unyaka esekleliswe kwabawu-10 abagaqele ibhande lomhlaba le-IBF. Sinohlelo lwezinyanga eziwu-12 kuya kweziwu-18 ngaye. Uma eqhubeka nokuwina uzolwela ibhande le-IBF. Emasontweni ambalwa ngizoya eDubai ngiyosayina isivumelwano esizohlomulisa abashayisibhakela base-Afrika,” kusho uNathan.