Usizi emndenini oshiselwe isitolo
UMNDENI oshiselwe isitolo obuqashise ngaso abokufika eMachobeni, eNanda, ukhala ngokuthi usuzobhuqwa yindlala njengoba bebethembele emalini yokuqashisa abokufika kuleli.
Isitolo obekudayisa kuso abokufika baseSomalia sishiswe sigcwele impahla yokudayisa ngoLwesine.
Kukhona nesinye isitolo esishisiwe kuyo le ndawo khona ngoLwesine.
Ngokuthola kweSolezwe kufike izimoto ezibalelwa kwezingu-10, kwehla abantu abafike bakhala ngokuthi leli bhizinisi liwisa amanye ngoba kushibhile abakudayisayo. Kuthiwa bachele uphethroli ezimpahleni bashisa.
Abaqashe lesi sitolo kuthiwa baphume ngesamagundane beshiya uR25 000 abese bewuthole ngokudayisa noR300 000 abawubeka kulesi sitolo.
UNksz Clara Mngadi (57) ngesikhathi evakashelwe Isolezwe ngoMsombuluko kulesi sitolo ubebalisa ngosizi ethi akazi ukuthi sebezodlani. “Imali yokuqashisa isitolo iyona esiziphilisa ngayo ngoba ilona ifa esalishiyelwa abazali bethu. Kumanje njengoba isitolo sishisiwe asazi ukuthi sizothathani sihlanganise nani. Kunezingane eziyizintandane engizondla ngale mali yokuqashisa.”
Elandisa Isolezwe uthe ingaphezu kwengu-10 iminyaka isitolo besiqashise laba bokufika kuleli.
Uthe bebephathene kahle ngoba bebeyikhokha ngesikhathi imali yokuqasha futhi bengakaze babe nezinkinga.
Uthe ukuqashisa kwesitolo kuyabasiza ngoba bona kabanawo amandla okudayisa kulesi sitolo.
Uthe lesi sitolo sakhiwa umkhulu wabo ngoba efuna kube ifa lomndeni wakhe.
Abazali bakhe babedayisa kusona, kuthe sebeshona yena nodadewabo abathathu kwaba ngesabo isitolo.
Kulo R4 000 abaqashisa ngawo isitolo bahlukaniselana nodadewabo.
“Phambilini sebeke basicekela phansi abantu isitolo kodwa sasivusa.
“Kulokhu sishe kakhulu, angazi noma sizokwazi yini ukusilungisa ngoba izindonga zilimele,” kusho uNksz Mngadi.
Kuthintwa obeqashe kulesi sitolo ozibize ngoMohamed, isibongo sangatholakala, uthe ulahlekelwe kakhulu njengoba kushe lo R300 000 nokudla abezokudayisa.
“Silindele emaphoyisa ngoba icala livuliwe,” kusho uMohamed ngamafuphi.
Abasolwa abathathu baboshiwe ngoLwesihlanu ngokusha kwesitolo.
Izolo bavelile eNkantolo yaseNtuzuma, icala lihlehlele isonto elizayo, uphenyo lusaqhubeka.