UZakwe uphonsele inselelo amaciko aseKZN
UMREPHA, uZakwe, uphonsele inselelo amaciko aseThekwini ake asebenza nomdidiyeli uBongani “Sir Bubzin” Cele ukuthi ahlanganise i-albhamu, inzuzo yayo yondle izingane zakhe.
UZakwe ubekhuluma eThekwini Community Church izolo ntambama ngesikhathi kunenkonzo yesikhumbuzo kaSir Bubzin (37) oshone ngesonto eledlule ngemuva kokuphathwa wumdlavuza wegazi.
“Ezinganeni zakhe ngithi sikhona. Ngeke zihlupheke sikhona. Yinja yami, yisosha lami. Bengimbiza kanjalo. Into enhle esingayenza ukuthi sihlanganise i-albhamu ukuze izingane zakhe zikhule,” kusho uZakwe kuqhuma ihlombe esontweni. Uthe izingoma zikhona ziningi. Uchaze uBubzin njengesosha elifela empini ngoba “ngesikhathi edidiyela i-albhamu yami yokugcina wayesho ethi kunzima kodwa asiyenze”.
Omunye osebenze noSir Bubzin, uDJ Tira, uncome ubumbano lwamaciko aseThekwini. Udalule ukuthi ngoSepthemba 2 kuzoba nekhonsathi yomculo ezoba seMashamplanez Lounge, eChesterville, nokuzothi inzuzo yakhona iyiswe emndenini walo mdidiyeli.
UTira uthe u-Agasti usuqala ukumthusa ngoba kungekudala kushone umculi wekwaito uR Mashesha.
“Angisakwazi ngisho ukugubha usuku lwami lokuzalwa ngoba kubuhlungu ngaphakathi, umngani wami, umuntu ebengisebenza naye senza izinto ezinhle akasekho emhlabeni,” kusho uTira.
Umufi ushiye emhlabeni izingane zakhe ezintathu, abafowabo abathathu nonina. Uzofihlwa ngeSonto eMemory ngaseMellville, KwaDukuza. Inkonzo izoqala ngo-8 ekuseni.